Nga Blendi Gashi
Shpend Ahmeti, gjatë përplasjeve në Vetëvendosje bëri ndërmjetësuesin për të ulur tensionet e krijuara mes krahut të Albin Kurtit dhe Dardan Molliqajt (ky i fundit shihet si fajtori kryesor për përçarjen në VV, pas kapjes me Albinin), por dështoi.
Pas një kohe të gjatë heshtjeje e lënies peng të opinionit, Ahmeti ndoqi rrugën e disa ish-vetëvendosësve dhe u largua nga VV.
Në letrën e dorëheqjes më 7 mars të këtij viti, ai nuk tregoi nëse do i bashkohej një partie që do të themelohej nga vetëvendosësit e larguar, pasi gjersa fliste për përçarjen tha se nuk pajtohet me njërin krah ose tjetrin sa i përket të vërtetës për të kaluarën.
Ahmeti i cili fitoi mandatin e dytë si kryetar i Prishtinës nën petkun e VV-së, në letrën e dorëheqjes u zotua se do i përkushtohet tërësisht punës në komunë dhe do të realizojë të gjitha premtimet.
“Qytetarët e Prishtinës i siguroj se e ardhmja ime politike është e lidhur më shumë se kurrë me Kryeqytetin. Jam i vetëdijshëm se ndoshta mund ta kemi më vështirë në Kuvendin Komunal por qëndrimet dhe bindjet janë më të rëndësishme se komoditeti. Unë mbetem i njëjti, besnik ndaj vetvetës dhe qytetarëve të Prishtinës. Me konceptin e transparencës dhe llogaridhënies i cili na mundësoi kthimin e normalitetit në qytet, do të vazhdoj të punoj në realizimin e reformave dhe zotimeve për një zhvillim të hovshëm dhe të barabartë të Prishtinës. E gjithë energjia ime do të fokusohet në krijimin e kushteve për një jetë më të mirë për qytetarët e Prishtinës të cilët duhet ta ndjejnë vetën të barabartë në mes veti dhe me banorët e kryeqyteteve tjera sa i përket ofrimit të shërbimeve dhe infrastrukturës publike”, tha ndër të tjera Ahmeti.
Por saktësisht pas dy muajsh e tre ditë, Ahmeti zyrtarisht mori anë dhe u bashkua me kundërshtarët e Kurtit, pra me grupin e Visar Ymerit (tezakut të tij) e Dardan Molliqajt; për më tepër u bë prijës i tyre në partinë që do të vazhdojnë rrugëtimin e tyre në politikë: u bë kryetar i Partisë Socialdemokrate.
Ahmeti, një ditë pasi u zgjodh në këtë post, në një konferencë për media të mbajtur të enjten u zotua se puna e tij në kryeqytet është prioritet karshi angazhimit të tij si kryetar i PSD-së.
Përkundër këtij deklarimi, ai më nuk do të ketë kohë t’i përkushtohet me tërë energjinë vetëm komunës së Prishtinës ashtu siç premtoi kur u largua nga VV. Tashmë mbi vete ka një barrë tejet të rëndë pasi një energji tejet të madhe duhet ta ndajë edhe për partinë, sidomos në këtë fazë fillestare ku zgjedhjet parlamentare mund të trokasin në çdo moment.
Përveç takimeve të zakonshme në parti, ai para vetes ka detyrën më të vështirë që t’i bindë qytetarët se pse duhet të bashkohen krah tij dhe kur të vijnë zgjedhjet pse duhet votuar PSD-në e jo partitë tjera, për çka i duhet të dalë në terren.
Përfundimisht mund të konkludohet se ardhmja politike e Shpend Ahmetit, më tepër është e lidhur me rezultatet që do ketë PSD-ja e tij se me udhëheqjen në Prishtinë.
Në rast se dështon edhe me PSD-në si me partinë Fryma e Re të cilën e themeloi më 2010 ku më pas ju bashkua VV, karriera e tij politike seriozisht do të vihet në pikëpyetje.
Sigurisht koha do ta dëshmojë nëse Ahmeti gaboi apo jo që u largua nga VV dhe mori drejtimin e një partie të vjetër që për gati 30 vjet në skenën politike kosovare asnjëherë nuk arriti ta kalojë pragun zgjedhor. /tesheshi.com/
