Nga Blendi Gashi
Bëri jo pak zhurmë largimi i Albena Reshitaj nga pozita e ministres së Mjedisit, siç tha ajo për arsye personale. Por si arsye kryesore e largimit të saj mendohet të jetë përplasja me drejtuesit e Aleancës Kosova e Re, ku ajo mban ende postin e nënpresidentes, konkretisht me Rrahim Pacollin, që është sekretar i partisë. E gjitha pasi portali ku ai është pronar, Arbreshinfo, javë më parë bëri një shkrim ku akuzonte Albenen për punësime familjare në ministrinë që drejtonte.
Por vetëm dy ditë pasi u largua nga pozita e ministres, Albena i është hakmarrë Pacollëve pasi ka pranuar të bëhet këshilltare e kryeministrit Ramush Haradinaj. Këtë gjë e ka bërë të ditur shefi i qeverisë.
“Pas lirimit nga detyra e ministres së Ambientit dhe Planifikimit Hapësinor, znj. Albena Reshitaj, kam konsideruar se njohuritë dhe përvoja e saj institucionale janë me rëndësi që të vazhdojnë të jenë në shërbim të qytetarëve të Republikës së Kosovës. Si Kryeministër i Qeverisë, jam i bindur se kontributi i ish ministres, është më së i nevojshëm, andaj i kam ofruar asaj postin e Këshilltares Politike, ofertë kjo të cilën ministrja e ka pranuar. Jam i bindur se vazhdimi i bashkëpunimit institucional me zonjën Reshitaj është në interes të qytetarëve dhe në funksion të implementimit të programit qeverisës”, shkruan Haradinaj në Facebook.
Pranimi i kësaj pozite tregon qartë se Albena nuk ka liruar pozitën e ministres me dëshirë, por pas konfliktit që ka pasur me krerët e AKR-së, sado që e ka mohuar edhe vet Rrahim Pacolli.
Me rreshtimin kah Haradinaj, ish-ministrja përfundimisht i bie se largohet edhe nga AKR-ja, (edhe pse ende zyrtarisht jo), por që shumë shpejt pritet ta bëjë këtë gjë, çka duhet pritur nëse do të flas për përplasjet me Pacollët.
Mbetet të shihet në ditët në vijim nëse Albena do të përforcon radhët e AAK-së së Ramushit. Dhe nëse kihet parasysh marrja e pozitës së re, por edhe duke ditur se vjen nga një komunë që udhëhiqet nga AAK-ja, pra Theranda (Suhareka), kjo nuk do jetë kurrfarë befasie.
Në anën tjetër, AKR-ja e Pacollit me përplasjen me Albenën dhe më herët me Mimoza Kusari-Lilën, të dyja këto ish-zv.presidente të partisë, po tregon se nuk po di të menaxhojë me emrat e rinj që po sjell, të cilët për arsye të ndryshme po i largohen dhe sigurisht po ja pamundësojnë ringritjen në skenën politike. /tesheshi.com/
