Pas lajmit se KE do akordojnë 20 miliard për rajonin, kryeministri Rama shpjegoi në një konferencë për shtyp se ç’përfaqësojnë fondet e ardhura nga Brukseli për Shqipërinë, si një përgjigje ndaj pyetjes hipotetike se ku “i çove?”.
“20 miliard nga BE, ju dhe të gjithë të jeni pak më skeptikë se miliardat e BE dhe të botës nga e thëna në të bërë kanë në mes 7 dete të tërë. Mirë se të vijnë miliardat! Nesër pres Komisionerin e Zgjerimit me shumë padurim se ai është nxitësi kryesor i paketës për Ballkanin dhe do të dëgjojmë detaje për këtë, se njëherë vjen 6, njëherë 7 pastaj bëhet 20. Kur i dëgjoni këto miliarda kini parasysh se mes tyre dhe nesh ka në mes 7 dete.
Ne edhe shkollat po i mbarojmë me paratë tona . E them këtë për të adresuar një problem që nuk e kishim, se po të mos kishim Rindërtimin do kishim pasur edhe anti-Covidin.
BE po fillon shkollat se kanë procedura të tjera, këto miliardat lidhen me gojën që më ra mua ka gjithë këto vite: Shengeni rajonal, shengeni rajonal. Mos m’i dëgjoni të gjitha por në çdo gjë që dëgjoni mund të kapni diçka sepse sot këtë perspektivë e hap Shengeni rajonal.
E bëra këtë shpërblim jo për të nënvlerësuar ndihmën, se e di që sa e nxorën këtë 20 mld do kemi nga ata që thonë në FB ku i çove 20 mld. Nuk vijnë këtu ato as me thasë, as me valixhe, as me kanoe, por me procedura që i bëjnë vetë që nga studimet, tenderët dhe përzgjedhjen e kompanive”, tha Rama në një dalje për mediat.
Aty, ai potencoi dhe njëherë rritjen e planifkuar të pagave në sistemin shëndetësor dhe atë arsimor, të cilën e konsideron si “historike”.
“Kemi detyrimin që t’ju japim një mbështetje të fortë për të shpërblyer mundin, angazhimin me dy kategori: fëmijët dhe ata që kanë nevojë për shërbim shëndetësor.
Paga për bluzat e bardha do të rritet 40%, më e madhja deri tani, paga për arsimtarët 15%”, tha i pari i qeverisë.
Rama iu përgjigj dhe grevës së naftëtarëve të Ballshit, duke u thënë se dhe me ata po angazhohet.
“Ajo është një kompani private, e privatizuar në mënyrë kriminale. Unë jam i përfshirë në mënyrë të vazhdueshme për të ndihmuar ata njerëz që janë aty. Do të shkruaja një libër më vete se çfarë kam bërë. Kam vajtur për të vizituar presidentin e Azerbajxhanit për këtë temë, do të ketë informacione në vazhdim se çfarë të rejash do të ketë.
Në këtë pikë kemi ndihmuar sa kemi mundur por për të na fajësuar se ne jemi përgjegjës për këtë është e tepërt.
Eshtë një ndërmarrje ku që në krye të herës, privatizimi ishte kriminal dhe asnjëherë nuk u bënë investime serioze për të ripërtërirë gjithë strukturën. Ajo rafineri është keqshfrytëzuar. Jam shumë i shqetësuar, më vjen shumë keq, jam gjithë kohën në informacione, s’ka nevojë për greva urie se unë jam në dijeni. Problemi i asaj rafinerie është në thelb dhe thelbi është i kalbur”, tha Rama. /tesheshi.com/
