Ditë më parë, kreu i Lëvizjes për Reforma në PDSH, Ziadin Sela, gjatë një prononcimi televiziv citoi me një ngjyrim cinik zëri tesheshi-in, pikërisht për një lajm të këtij portali, hartuar nga unë si korrespondent i Maqedonisë, ku në qendër të tij ishte pikërisht ai, për një akt individual me pasojë mosfunksionimin e një aleance të gjerë opozitare ndër parti shqiptare, në përballje me dyshen në pushtet Gruevski – Ahmeti.
Ne e dijmë se kjo punë jo çdokënd mund ta lë kënaqur; por ajo që ndoshta nuk na jep kënaqsi as ne prej të tilla reagimeve, por diçka të përafërt me të, është të qënit të qetë se askujt nuk ia kemi me të keq, në kuptimin me bastard të fjalës.
Kjo, gjersa parim të punës kemi thjesht atë që shkruhet tek misioni i faqes tesheshi.com, ku pak e saktë sqarohet e gjitha fryma e llojit të të bërit gazetari.
Në e dijmë gjithashtu se gjatë informimit, mundet që dikujt dhe t’i djeg diçka, por prapë jemi të qetë se masa e nxehtë e një informimi nuk ka assesi qëllim që të prek personin, por veprën e tij, atë që nuk shkon në raport me interesin e përbashkët.
Të qetë jemi po ashtu se ne, veç këtyre parimeve nuk kontrollohemi nga askush, siç Sela e tha fjalëpërfjalshëm që jemi prej të BESA-s.
Nëse vërtet do ishim të tillë, nuk do qe e mundur që Sela e BESA të kishin te Sheshi një hapësirë gati të njëjtë pasqyrimi aktivitetesh, deklaratash, apo dhe prononcimesh ekskluzive.
Mjaft t’i kujtojmë politikanit Sela se në pikënisjen e themelimit të strukturave të lëvizjes së tij, pikërisht në atë qytet i cili llogaritet bastion i BDI-së, portali tesheshi.com, duke i’u referuar prezencës masovike të kërçovarëve në atë tubim të LR-PDSH-së doli me titull “Ziadin Sela po i’a merr Kërçovën Ali Ahmetit”( http://localhost/tesheshi/zijadin-sela-po-ia-merr-kercoven-ali-ahmetit/).
Nëse ne kontrollohemi nga BESA, e si mundet pra që ajo të na e lejojë një reklamë të tillë për atë që nuk po ia gjen dot telat?!
Sakaq, shprehje tjetër e një korrektësie ndaj LR-PDSH-së, është fakti se Arben Taravari, Sekretar i Përgjithshëm i këtij organizmi politik, për çdo javë merret nga portali tesheshi.com që të shprehë qëndrimet e tij partiake.
Po ashtu, kujtojmë dhe dy intervista që tesheshi.com ka realizuar, si me Selën e si me Taravarin.
Kaq sa i përket BESA-s, kontrollit të aluduar të kësaj force politike mbi ne dhe korrektësisë gazetareske.
Të tjerat mbeten të hapura: ne jemi të bindur që nuk kemi shpifur, ju mbroni të kundërtën. T’ja lemë kohës ta provojë.
Për hir të interesit të përbashkët, atij shqiptar në Maqedoni, do donim të ishim ne në gabim.
Por të paktën deri më tani, gjuha e realitetit politik të opozitës shqiptare, po tregon se jeni ju.
Dhe në fund: ne vërtet kontrollohemi nga Besa – pra ajo që nis me të madhe – a më saktë kemi inspirim prej saj, prej të qënit njerëz të Besës, që nuk u dalin fjale parimeve me të cilat nënshkruajnë marrëveshje, e që pra me të cilat lidhin besën: që t’i shërbejmë të vërtetës, të drejtës, interesit mbarëshoqëror.
Në këtë pikëpamje, ne jemi gati të kontrollohemi dhe nga Ziadin Sela, nëse dhe ai i posedon këto parime në misionin e tij politik. /tesheshi.com/
