Në një zyrë në qendër të kryeqytetit irlandez, Dubin, dhjetëra punonjës të Facebook po punojnë për të mbrojtur zgjedhjet e ardhshme evropiane.
Një grup prej njëzetë e diçka programuesish, koduesish, inxhinierësh dhe specialistësh të përmbajtjes, qëndrojnë ulur para shumë ekraneve gjigante duke skanuar gjithë rreziqet që mund t’i shfaqen platformës Facebook.
Televizorët e montuar në mure i mbajnë në njoftim për zhvillimet më të reja në BE, dhe jo pa shkas është e gjithë kjo vëmendje. BE-ja ka insistuar që përmbajtja e hedhur në Facebook të qëndrojë larg gjuhës potenciale të urrejtjes dhe dhunës, duke gjobitur vazhdimisht rrjetin më të madh social në botë.
Në muret e zyrës shihet flamuri i BE-së, e shumë pranë tij një poster me sloganin “Mënyra të reja të vështrimit.”
Pavarësisht stafit prej 40 personave që Facebook ka angazhuar për të përcjellë përmbajtjen lidhur me zgjedhjet në BE, gjigandi komunikues po ka vështirësi në eliminimin e të gjithë rreziqeve.
Grupet politike nga Hungaria dhe Spanja kanë arritur për të hakeruar mjetet e transparencës së Facebook, duke lançuar fushata partizane që anojnë votuesit potencialë.
Në mesin e mesazheve qarkullon edhe ai i Viktor Orban, kryeministrit hungarez, dhe i Verein Recht und Freiheit (Shoqata për Ruajtjen e Sundimit të Ligjit dhe Lirive Civile), një grup mbështetës i partive djathtiste gjermane.
Grupet e ekstremit të djathtë si Alternativa për Gjermaninë dhe Fronti Nacional i Francës, ende dominojnë diskutimin politik në Facebook, pak përpara votimeve të këtij muaji.
Dhe teksa zgjedhjet e 23 majit po afrohen, Facebook ende nuk ka publikuar asnjë përpjekje të suksesshme lidhur me pengimin e fushatave mashtruese digjitale që kanë në fokus “mashtrimin e votuesit evropian”.
Facebook mund të mos e dojë këtë rol, por shtrirja e tij globale e vendos atë në zemër të proceseve demokratike, nga Franca në Filipine.
Me aq shumë rrezik, rrjeti social është duke u rikonstruktuar si kurrë më parë. Disa vende po kërcënojnë të zbatojnë kufizimet ligjore në atë që është postuar në Facebook nëse kjo e fundit nuk bën më shumë.
Që kur grupet e mbështetura nga Rusia që me sukses vunë në shënjestër votuesit amerikanë gjatë fushatës presidenciale të vitit 2016, kompania ka rezervuar dhjetëra milionë dollarë për teknologjitë e reja, kontrolluesit e përmbajtjes dhe fushatat e marketingut për të edukuar votuesit dhe politikbërësit rreth kërcënimeve të mundshme në rrjetin e saj global.
Facebook kohët e fundit ka ndaluar disa figura publike të profilit të lartë, duke përfshirë komentatorin amerikan të ekstremit të djathtë Alex Jones, lidhur me komentet e urrejtjes.
Por, ndërsa zgjedhjet evropiane po afrohen, Facebook është prapa kuintave për t’iu përgjigjur formave të reja të keqinformimit dhe reklamimit politik. Rrjeti social është ende duke u përballur me “rolin e saj të tepërt” në zgjedhjet në mbarë botën.
“Facebook po vepron në një mënyrë që nuk është parë kurrë në Silicon Valley dhe dezinformimi e kërcënimet në internet janë ngjashëm, në një shkallë që kurrë nuk i kemi parë”, thotë Mathias Vermeulen, një studiues në Fondacionin Mozilla, një organizatë jofitimprurëse e fokusuar mbi të drejtat dixhitale.
“Ka shumë vullnet të mirë lidhur me atë që Facebook po bën, por ndoshta është pak vonë”, përfundon ai. /tesheshi.com/
