Deputeti i ri i LDK-së, Lumir Abdixhiku, ka hedhur akuza në drejtim të presidentit Thaçi për siç thotë zvarritjen e procesit të thirrjes së mbajtjes së seancës konstituive në Kuvendit. Sipas tij, kreu i shtetit është duke i bërë favor ish-partisë së tij PDK-së të cilën e udhëheqi për më shumë se 16 vite.
“Adresa e vetme që të thërritet mbledhja konstituive është Presidenti i vendit. Ai pa asnjë arsye po e mban të vonuar thirrjen e kësaj seance. Por Presidenti dëshiron t’i bëj asist, PDK-së”, ka deklaruar Abdixhiku, në një intervistë për Telegrafin.
Ai më tej ka shtuar se nuk e kupton arsyen e vërtet të kësaj vonese në këtë kohë kur Kosova është në një gjendje që nuk duhet të vonohet.
“Me të drejtë Kushtetuta e Republikës së Kosovës i jep të drejtë që mandatin e parë për formimin e Qeverisë ta bëjë koalicioni fitues. Po ashtu është shumë e qartë në Kushtetutë që nëse i pari nuk e arrin formimin e Qeverisë, atëherë e merr përsipër mandatari i dytë”, u shpreh tutje ai.
Abdixhiku gjatë intervistës tha po ashtu se nuk ka arsye për bllokim të formimit të Qeverisë, pasi sipas tij ka interpretime të qarta Kushtetuese.
“Sot gjërat janë të qarta përveç nëse dikush ka interes të shkel Kushtetutën”, ka thënë tutje Lumir Abdixhiku, duke i bërë thirrje Thaçit që t’i respektoj afatet Kushtetuese. /tesheshi.com/
