Ai dhe vëllezërit e tij u përfolën nga një gazetë meksikane si të përfshirë në pastrim parash për një klan mafioz namkeq në vendin amerikanoqëndror. Mbas ca ditësh, ka ardhur reagimi i kryesorit, Luftar Hysa, një nga vëllezërit Hysa, që ka mohuar gjithçka. Por gjithsesi jo fakt që është bos kazinosh në vende latine.
Ai ka thënë se nuk ka asnjë lidhje me shkrimin dhe se janë sulme të kundërshtarëve në biznes. Hysa, u shpreh se nëse do të ishte një pastrues parash i Sinaloa-s meksikane, nuk do të ishte duke dhënë intervistë(në Opinion) por në listën e të kërkuarve në Interpol.
Ai rrëfeu jetën e tij, disi të pasakontë, duke kujtuar se deri në 98-ën ka qenë kryetari i PD-së në Belsh. Dhe që prej atij viti është larguar drejt Afrikës së Jugut dhe më pas ka shkuar në Peru e në Meksikë, ku ka nisur biznesin e lojërave të fatit. Atje ai tha se kishte shkuar bashkë me vëllezërit për të takuar Leka Zogun.
“Jam larguar nga Shqipëria në vitin 1998. Nga viti 90 kur u diplomova si inxhinier deri në 98-ën kam punuar si inxhinier dhe kam qenë dhe kryetar i PD-së në Belsh. Jam larguar nga Shqipëria në ngjarjet e 97-ën. Unë jetoja në Cërrik dhe aty kam pasur probleme. Jam larguar drejt Afrikës së Jugut ku jetojnë dhe vëllezërit e mi. Vëllai im jetonte në Afrikë prej vitit 1993.
Atje jetonte Leka Zogu. Donim të takonim atë. Unë kam jetuar në Afrikën e Jugut deri në vitin 2001, vetëm pa familjen time. Pa gruan, pa fëmijët, pa familjen.
Nga Afrika, se kishim një biznes modest atje, kemi shkuar në Peru se donim të hapnim lojrat e fatit. Edhe në Afrikë kishim lojrat e fatit. Në atë kohë lejoheshin. U vendosëm në Peru dhe unë kam qëndruar atje nga viti 2001 deri në vitin 2004. Kam jetuar në Lima.
Në mars të vitit 2004 kam shkuar në Meksikë. Për 18 vite operoj në Meksikë dhe prej vitit 2016 jam shtetas meksikan. Familja ime jeton në Kanada. Unë jam rezident në Kanada sepse nuk mund të mbaj më shumë se dy pasaporta. Partneri im i vetëm në biznes është vëllai im. Kemi 10 biznese në disa vende të Meksikës.”
Tashmë dhe me disa investime në Shqipëri, në fushën e turizmit, ai mohoi tërësisht të ketë lidhje me ndonjë kartel droge në Meksikë. /tesheshi.com/
