Kur e gjithë vëmendja e opinionit është te koronavirusi, policia shqiptare ka arritur të kapë dy kokat e grabitjës së bujshme në Rinas më 9 prill 2019, pikërisht vëllezërit Çala, Klement dhe Eldi. Ka qenë një operacion me pjesëmarrjen e dhjetra forcave policore, duke i zënë ata në Qerret në Kavajës ku fshiheshin në një banesë.
Për kapjen e Klement Çalës, 32 vjeç nga Elbasani, policia kishte vënë 10 mijë euro shpërblim për këdo që jepte informacion për vendndodhjen tij. Klement Çala ka bërë edhe grabitjen në vitin 2017, iu bë pritë blindave që transportonin paratë e bankës drejt Rinasit
Çala është ndër pjesëtarët e grupit të Ilir Kupës që u arratisën nga burgu i Trikallës në Greqi më 22 mars 2013 dhe së bashku me Admir Muratajn (i vrarë), u fshehën në Shqipëri.
Ministri Lleshaj shkroi se “kapja e dy protagonistëve kryesorë të grabitjes së vitit të kaluar në Rinas shënon një sukses të madh në luftën kundër krimit të organizuar. Laku ndaj bandës së rrezikshme të Rinasit është afruar sot drejt mbylljes së plotë”.
“Kjo goditje është dhe një mesazh i rëndësishëm ndaj krimit: është vetëm çështje kohe! Përballja me ligjin dhe drejtësinë është e pashmangshme. Përgëzime për gjithë ekipin e Policisë së Shtetit që mundësoi këtë sukses inkurajues në këto ditë të vështira.Operacioni vazhdon”, shprehet Lleshaj. /tesheshi.com/
