- Tash
Kolapsi politik, ekonomik e social, që e ka përfshirë shoqërinë kosovare, e ka zvarritur shtresën e mesme të kësaj shoqërie buzë një rreziku të madh (ajo është më pranë falimentimit se kurrë më parë). Ndërkohë që presidenti Thaçi përgatitej t’i merrte në dorë çelësat e njërit prej institucioneve më të rëndësishme në vend, “prapa krahëve” të tij spekulohej për bisedime të fshehta, për një koalicion të gjerë qeverisës, që do të përbëhej nga PDK-ja, LDK-ja, AAK-ja dhe NISMA. Spekulimet në fjalë sa vijnë e bëhen më të qarta për opinionin, por nuk paraqesin në vetvete një dukuri të pazakonshme. Subjektet politike në vend përherë kanë rënë pre e hipokrizisë së tyre, duke i shkelur vijat e kuqe për të cilat vetë na kanë siguruar se nuk do t’i shkelin. Nga kjo perspektivë, zëvendësimi i LDK-së me AAK-në e NISMA-n, ose edhe plotësimi i yrnekut aktual politik me këto dy të fundit (AAK-në dhe NISMA-n), nuk përbëjnë në vetvete NDRYSHIMIN, aq të nevojshëm për qytetarët. Të gjitha këto mënyra mund të cilësohen si të vjetra për të ardhur deri te ndryshimi. E keqja më e madhe është se reflektimi i krizës politike për një kohë të gjatë do të ndikojë edhe në institucionet e tjera vitale të shtetit, si në arsim, shëndetësi, në sistemin gjyqësor, etj.
- Retrospektivë
Tashmë ish-presidentja Atifete Jahjaga përbën një histori në vetvete. Ajo është mostra më e mirë përmes së cilës mund ta ilustrojmë nivelin kulturor-politik të shtetit. Përpara ardhjes së saj, askush nuk dinte se kush ishte e ç’punë bënte. Karriera e saj filloi me një hop të mrekullueshëm, duke u bërë hiç më pak se presidente e shtetit të Kosovës. Por opinioni përreth saj ndahet në dysh; ka nga ata që edhe e lavdërojnë punën e saj, e thonë se ka kontribuar në ndreqjen e imazhit të Kosovës, ndërsa të tjerët shohin fare pak (ose aspak) të mira në veprimtarinë e saj të deritanishme. Forca e saj më e madhe është dëshmuar në ndarjen e dekoratave, në praninë në aktivitetet formale, por kurrë në ndreqjen, përmirësimin, drejtimin, e aq më pak në ndryshimin e situatave të komplikuara politike. Për çka do të mbahet mend???
- Perspektivë
Në krye të vendit do të dalë herët a vonë një shtresë e re politikanësh, të cilët përveçqë do të jenë më të arsyeshëm, kanë për të qenë edhe më të ndërgjegjshëm për sa u përket premtimeve dhe realizimit të tyre. Lufta e tyre më e madhe do të jetë përballja me krimin e organizuar. Atë krim që është shtresuar në institucionet tona, pa dallim, për vite me radhë. Strategjia e tyre do të nisë me zbulimin, promovimin dhe mbështetjen e heronjve të rinj (prokurorëve e gjyqtarëve). Mandej ndikimi i tyre do të shtrihet në fushën e arsimit (aortës së shoqërisë), shëndetësisë e ekonomisë. Herët a vonë do të ngjiten në krye të vendit njerëz me kredo morale e intelektuale, njerëz këmbëngulës, vizionarë e të guximshëm, që do t’ia presin kokës metastazës së korrupsionit dhe krimit të çfarëdolloji. Herët a vonë kanë për të ardhur në krye të vendit njerëz që do t’ua kthejnë shpresën të rinjve, do ta pastrojnë vendin prej mbeturinave…; dhe malet do të vazhdojnë të rriten, lumenjtë do të marrin frymë më lirshëm, fushat…
Kjo kohë nuk është larg. Ende nuk e kemi parë… /tesheshi.com/
