Në një shkrim të dobët, të pafuqishëm për kah forca e argumentimit dhe pa pikë stili, Xhavit Haliti, hiq më pak se një figurë e njohur e skenës politike kosovare (nënkryetar i Kuvendit të Kosovës), madje edhe një ish zyrtar i lartë, pjesë e strukturave të UÇK-së, paska bërë përpjekje që të reflektojë rreth preferencës së pazakontë të opozitës: për të protestuar në ditë feste. Hirësia e tij, siç e dimë, është ballafaquar edhe me akuza të rënda që kanë të bëjnë me të kaluarën e tij si zyrtar i lartë, pjesë e strukturave të UÇK-së (akuza për vrasje politike si dhe zhvatjen e milionave nga fondet e dedikuara për ndihmë ndaj UÇK-së). Por këtu s’na hyn në punë kjo gjë, na mjafton të kuptojmë se Haliti është prototip i politikanit të zakonshëm shqiptar (personaliteti i të cilit karakterizohet nga dy anë: anën e errët, në të cilën bën pjesë e kaluara e tij, kurrë e sqaruar siç duhet dhe pjesën e anës së dukshme: pasuria milionëshe e grumbulluar për pak vite. Agjencia Kundër Korrupcionit, viteve të fundit, në vazhdimësi i ka bërë publike deklarimet e pasurisë së zyrtarëve të lartë politikë, në listën e të cilëve Xhavit Haliti del me qenë një milioner). Pra politikani milioner**, te shkrimi ‘Protesta në festa’ veç tjerash, shkruan:
“Nëntori, shpallja e Pavarësisë së Shqipërisë, si akti që ndryshoi dhe determinoi fatin tonë kombëtar, si dhe 17 Shkurti, data e Pavarësisë së shtetit tonë të ri 8-vjeçar, janë festa që çdo shqiptar pret t’i festojë dhe jo të “qajë” për hallet politike, familjare e personale.”
Këtu në këtë pjesë, Milionerit Haliti, i përvijohet një argumet shumë i dobët, siç edhe pezmi i tij i thellë i shprehur në raport me datat e caktuara, preferenca të opozitës për ditë protestash. Argumenti se çdo shqiptar pret t’i festoj këto festa, shoqërohet me të tjerë, po kaq të dobët se me këto festa po kërkohen zgjedhjet e parakohshme, ose argumenti/ pyetja retorike:
“Por a janë perëndimorët të gatshëm të menaxhojnë dëshirat tona?”
I gjithë ky diskurs, m’i kujton disa pika nga Dekalogu i Chomsky***-t që thonë:
“Populli duhet ta ketë gjithnjë mendjen të zënë me tjetër gjësend dhe jo me problemet e vërteta. Për këtë: T’ia largosh vijimisht vëmendjen nga problemet sociale reale duke e kthyer drejt çështjeve më të vogla, por me ndikim të madh emocional.”
Ose:
“Populli duhet katandisur në një gjendje mendore që të mos i lejojë të përhapë lidhjet mes shkaqeve dhe pasojave. Për këtë: T’u drejtohesh njerëzve sikur të kishin gjithë një mendim infantil. Në këtë mënyrë i përçon turmat ndaj një lloji të menduar sipërfaqësor, naiv dhe më të gatshëm për intoksikime informacionale.”
Siç e shihni në diskursin e politikanit Milioner, Halitit, provohen të aplikohet logjika e politikës shtypëse ndaj masës, të cilën për mrekulli e detekton Chomsky në dekalogun e tij. Arsyetimi i Halitit se pse nuk duhet të protestohet në këto data, ilustrohet me argumentet se: festat me rëndësi nacionale e kombëtare, nuk duhet të shndërruar në data protestash sepse, çdo shqiptar do të kënaqet në këto festa, do t’i festojë dhe sidomos sepse perëndimorët nuk janë të gatshëm t’i menaxhojnë dëshirat tona. Të dyja këto argumente mund të futen te strategjia të cilën e detekton Chomsky: që populli duhet ta ketë mendjen e zënë, por jo me problemet e vërteta dhe kjo arrihet duke shpikur probleme të tjera, më të vogla, por me efekte më të gjera në aspektin emocional. Preokupimi i tij me atë se ç’mendojnë perëndimorët për ne, për çështjet tona, njëkohësisht futet edhe te ajo strategji që kërkon që politikani t’i drejtohet popullit, sikur ky i fundit të kishte një logjikë infantile.
Shoqëritë shqiptare, në të gjitha hapësirat gjeografike (Shqipëri, Kosovë, Maqedoni etj), aktualisht, ballafaqohen me probleme serioze në të gjitha rrafshet. Atë politik, arsimor, ekonomik, social e kulturor etj. Shteti ligjor, në të gjitha hapësirat e referuara, nuk është konsoliduar dhe si i tillë, nuk funksionon. Në çdo rrafsh që ta marrësh, mekanizmi shtet, pothuajse nuk funksionon për së mbari. Nisur nga kjo perspektivë, shtetet tona dalim me qenë shtete oligarkike para së gjithash, si rrjedhojë nuk ka komoditet për festime.
Natyrisht kjo nuk na bën pro-opozitar, për arsyen e thjeshtë sepse, po qe se do të vinte në pushtet, natyra e shtetit si shtet oligarkik, nuk do të ndryshonte aspak. Megjithatë, për një kohë të shkurtër, çdo alternativë tjetër, pra edhe opozita aktuale kosovare, do të ishte më pak e dëmshme se sa shoqëria halitjane që është duke e qeverisur vendin. Nuk besojmë që mund të bëhet më keq se kaq…/tesheshi.com/
_________________________________________
*http://localhost/tesheshi/nga-xhavit-haliti-protesta-ne-festa/
** http://www.telegrafi.com/ekonomi/lajme-ekonomi/deputetet-super-milionere.html
“Xhavit Haliti, nënkryetar i Kuvendit (PDK)
Pasuri e paluajtshme: Tokë bujqësore, 500 mijë euro, shtëpi familjare, 250 mijë euro, shtëpi familjare, 250 mijë euro dhe banesë, 200 mijë euro
Pasuri e luajtshme: Veturë në vlerë prej 7 mijë eurosh dhe stoli ari në vlerë prej 25 mijë eurosh
Aksione: 9 mijë e 250 euro
Para të gatshme: 139 mijë e 807 euro
Të hyrat vjetore: 28 mijë e 536 euro nga Kuvendi i Kosovës”
***http://www.penaime.com/2904-2/
