Në Gjakovë, pasi vizitoi një fabrikë mielli, kryeministri Edi Rama deklaroi se Shqipëria do të heqë tarifat doganore për mallrat që vijnë nga Kosova.
“Ne jemi në një fazë të avancuar për të hequr plotësisht të gjitha tarifat doganore për të gjitha mallrat që vijnë nga Kosova në drejtim të Shqipërisë. Janë barriera të panevojshme. Impakti i tyre financiar është më pak i rëndësishëm për ne si shtet, se sa lehtësia që duhet t’i krijojmë të gjithë atyre që eksportojnë drejt Shqipërisë”, tha kreu i qeverisë së Tiranës, i ndodhur në Kosovës në kuadër të mbledhjes së radhës së dy qeverive, e cila do mbahet në Prishtinë.
Rama theksoi se diçka të tillë, Shqipëria e ka bërë në nismën rajonale “Ballkani i Hapur” dhe do ishte e pakuptimtë që të kishte tarifa për Kosovën.
Ai shpresoi se edhe Kosova do e bënte diçka të tillë, teksa shtoi se qeveria kishte kërkuar më shumë kohë për ta studiuar.
“Shpresojmë që edhe qeveria e Kosovës ta bëjë reciprokisht, ka kërkuar kohë për ta studiuar. Ta studiojnë, por në të gjitha rastet ne do e bëjmë në mënyrë të njëanshme. Të gjitha mallrat nga Kosova do të vijnë në Shqipëri pa asnjë tarifë doganore”, u shpreh i pari i qeverisë shqiptare. /tesheshi.com/
