Nga Gabigol te Batshuayi, dhjetë transferimet më të këqija të sezonit futbollistik në mbyllje

Pak gjë ka mbetur për t’i dhënë fund sezonit futbollistik 2016-2017 në Europë. Shumë prej blerjeve në nisje të tij kanë rezultuar të qëlluara, por shumë të tjera flasin për të kundërtën.

Transferime të reja pritet të ndodhin gjatë muajve të verës, që kulmojnë në ditët e fundit të gushtit, e ndërkohë goal.com sjell një përmbledhjeve të blerjeve më të dështuara të sezonit në mbyllje e sipër.

Portali i njohur sportiv e nis me brazilianin Gabigol, që la Santosin për t’u pritur me shumë bujë në Milano.

Krahasimi i lojtarit të Interit me Neymar-in ka rezultuar një flluskë. 20-vjeçari i transferuar për 29.5 milionë euro do të shënonte vetëm një gol në nëntë aktivizime në kampionatin italian.

Për të ka kohë përpara për të gjetur vetveten, thotë goal.com, por Interi mund të mos ketë durimin për të pritur.

I nëntë në radhë është Andre Schurrle, i transferuar brenda Bundesligës, nga Volfsburgu te Borusia e Dortmundit, për 30 milionë euro.

Një sezon fantastik për të te Volfsburgu është shoqëruar nga një tjetër aspak i tillë te Borusia e Dortmundit.

Ish-lojtari i Çelsit qe pjesë e formacionit të parë të Borusias në Bundesligë vetëm tetë herë, duke shënuar dy gola; pritshmëri aspak e përmbushur për një lojtar të tillë si Schurrle.

Dështimi tjetër vjen po nga Bundesliga, e bëhet fjalë për portugezin Renato Sanches.

I marrë nga Benfika si një nga talentet më të spikatur në Europë, dhe me një Europian të suksesshëm për të, 19-vjeçari do t’i niste më së shumti ndeshjet i ulur në stol te Bajerni i Mynihut.

Një tjetër portugez zë vend në listën e dhjetë tranferimeve më të dështuara. Bëhet fjalë për Andre Gomes-in, i cili nga Valencia do të kalonte te Barcelona për 35 milionë euro.

Përgjithësisht zhgënjyes përgjatë sezonit, goal.com thotë se te Barcelona presin shumë më tepër prej lojtarit të përfaqësueses portugeze.

I gjashtë në listë është Islam Slimani, një golashënues i spikatur me Sportingun e Lisbonës, por aspak kështu te Lestër Siti, klubi që harxhoi 30 milionë euro për të.

Lojtari i përfaqësueses algjeriane kishte shënuar 27 gola në 33 ndeshje në sezonin pararendës në Portugali, por në Premier League realizoi vetëm 7 gola në 23 ndeshje për kampionët në fuqi.

Lucas Perez është një nga dështimet e Arsenalit. I paaftë për të lënë gjurmë që prej kalimit nga Deportivo, sulmuesi spanjoll pritet të largohet nga “topçinjtë”.

Vetëm 7 gola për të në 21 ndeshje të luajtura në të gjitha aktivitetet për Arsenalin; shifra që e lënë të hapur vetiu derën e largimit.

I ashtuquajturi Ruud van Nistelrooy i ri nga media holandeze, Vincent Janssen ka patur një sezon të parë katastrofik te Totenhemi, raporton goal.com.

Dy gola për 22-vjeçarin në 27 aktivizime në Premier League, njëri prej të cilëve me 11-metërsh, nuk lënë vend për shumë koment.

Jese është në vend të tretë te dështimet e transferimeve të sezonit. Kalimi i tij nga Reali i Madridit te PSG-ja në Francë nuk qe aspak efikas.

Një shumë prej 25 milionë eurosh u shpenzua për një futbollist që vetëm në një ndeshje të kampionatit francez qe pjesë e formacionit të parë për PSG-në. Jese do të huazohej më vonë te Las Palmasi, ku duket ta ketë gjetur disi veten.

Një ndër blerjet e Guardiola-s në sezonin e tij të parë te Mançester Siti qe Claudio Bravo, që nuk ia doli të përshtatej me futbollin anglez.

Gabimet e njëpasnjëshme e bënë portierin kilian të ardhur nga Barcelona me shumë zhurmë që nga pjesë e padiskutueshme e formacionit të përfundonte në stol.

Vendin e parë te blerjet më të këqija, sipas goal.com, e mban Michy Batshuayi, sulmuesi i Çelsit.

Belgu u ble për 39 milionë euro nga Olimpiku i Marsejës, por paraqitjet e tij nuk të thonë asgjë për një shumë kësisoj të shpenzuar për të. Ai u aktivizua që nga fillimi vetëm në një ndeshje të Çelsit në kampionatin anglez. /tesheshi.com/