Djali që sakrifikoi jetën e tij në përpjekje për të shpëtuar atë të dy vajzave meriton të jetë në listën e dëshmorëve. Veprimi i tij tregon karakterin, shpirtin dhe zemrën e një besimtari të kalitur me mësimet e Zotit, i cili nuk ka dyshim në veprimet që duhet të bëjë në shërbim të së mirës.
Që njeriu të sprovohet nga Zoti me shpëtimin e një jete ndodh rrallë në jetë, një herë apo dy herë, por zakonisht i ngjet çdo njeriu herët a vonë. Shumë njerëz nuk angazhohen fare që ta përmbushin këtë sprovë nga Zoti, siç ishte rasti para dhjetë ditësh i një të moshuari që vdiq në Gjilan vetëm nga mungesa e pak vëmendjeje, e pak uji që të freskohej, apo mbase e një makine që ta dërgonte në spital.
Shembulli i këtyre njerëzve është tipik i një jobesimtari që nuk e kupton se atë njeri (në rastin në fjalë, të moshuarin që vdiq) Zoti e ka sjellë te këmbët e tij për të provuar se sa vlen ai. E shikonin të moshuarin duke dhënë shpirt dhe vazhdonin të ecnin, pa ndaluar. Për këta njerëz nuk vlen agjë përveç lëkurës së tyre. Këta njerëz e rëndojnë shoqërinë njerëzore dhe e prishin atë!
Kur këto qenie njerëzore nuk bëjnë asgjë për të shpëtuar një jetë njeriu, duke qenë se jeta dhe njerëzit janë gjërat më të vlefshme që ka shoqëria, çfarë mund t’i vlejnë një shoqërie?
Këta janë njerëz të cilët kur përballen me paranë e adhurojnë atë dhe bëjnë gjithçka për ta patur.
Kur u duhet të mbajnë një qëndrim, asnjëherë nuk mbajnë qëndrimin e drejtë, e asnjëherë nuk janë me të vërtetën, por vetëm kanë servilosje, interes dhe konformizëm.
Këta njerëz as nuk e kritikojnë, e as nuk e kundërshtojnë, pushtetarin e mbytur në korrupsion, por vetëm presin që ai t’u ndajë diçka nga ajo që ai ka vjedhur.
Këta njerëz nuk janë me të drejtën, nuk janë në anën e Zotit!
Benjamini ishte shembull i anës së mirësisë.
Benjaminin dhe njerëzit si ai çdokush kërkon t’i ketë në popullin e tij, në qytetin e tij, çdokush i do në lagje, çdokush dëshiron t’i ketë fqinj, t’i ketë pranë.
Këta janë njerëz nga të cilët shoqëria ka vetëm dobi. Këta janë shembuj të së mirës, e brenda vetes janë plot me dashuri dhe mirësi; cilësi që i shprehin me sjelljet dhe veprat e tyre.
Benjamini e ka ditur fort mirë fjalën e Zotit, se kush shpëton një jetë, është njëlloj si të ketë shpëtuar të gjithë njerëzimin.
Ndihem krenar që populli ynë ka djem të tillë si Benjamini.
Familja e tij të jetë krenare për djalin që ka nxjerrë prej gjirit të saj.
Besimtarët të luten për të.
Benjamin, Zoti e bëftë varrin tënd kopsht të xhenetit! /tesheshi.com/
