Çështja e së kaluarës kosovare plot dritëhije të kreut demokrat Basha qe temë në debatet e mbrëmjes në tv shqiptare. Vetë ai, në Opionionin e Fevziut, mohoi të jetë takuar ndonjëherë, apo dhe ta njihte Melaim Bellanicën, njeriun që prej vitesh këmbëngul që i ka dhënë Bashës, me kërkesë të këtij të fundit në emër të Hagës, kasetën disaminutëshe me pamje nga masakra e Krushës.
“Asnjëherë nuk e kam takuar zotin Bellanica…”, ishte deklarimi i Bashës, që po ashtu, ofroi një CV të punësimit në Kosovë gjatë pasluftës.
Në Mitrovicë legal oficer, por fillimet kanë qenë si përkthyes por rekrutimi ka qenë si legal oficer. Së dyti në Prishtinë për afro një vit e pak si përgjegjës për zonën amerikane të administrimit të Kosovës. Në zonën e Gjilanit për ngritjen dhe këqyrjen e komponentit të drejtësisë kosovare, pra rrol administrativ dhe jo hetimor. Pas kësaj asistent i veçantë i drejtorit të departamentit të drejtësisë që ishte de facto ministri i drejtësisë së Kosovës. Që konsistonte në punën e transferimit të punës nga UNMIK-u dhe ngritjen e ministrisë së Kosovës. Pas kësaj detyrat e mija në Kosovë kanë mbaruar dhe i jam bashkuar Partisë Demokratike”, tha Basha.
Ai mohoi të ketë marrë pjesë në ndonjë proces apo hetim ndaj UÇK-së.
“Kurrë në asnjë çast nuk kam marrë pjesë në asnjë lloj procesi dhe nuk kam patur asnjë lloj aksesi në asnjë informacion hetim dosje që kishte të bënte me Ushtrinë Çlirimtare të Kosovës”, theksoi Basha.
Nga ana tjetër, në Real Story-n e Sokol Ballës, Rama tha se nuk ishte ai që e akuzonte Bashën, porse ky i fundit ka si detyrim moral që të sqarojë akuzat që i bëhen në Kosovë.
“Unë s’jam i dëshiruar që çfarë thuhet për të të jetë e vërtetë, as po kërkoj të shfrytëzoj rastin për ta anatemuar Bashën si tradhëtar, që i kam vuajtur vetë në kurrizin tim, por kurrë nuk i kam përdorur vetë. Nuk është çështja për tradhëti por transparencë.
Një drejtues, një përfaqësues i një familje të thjeshtë siç është familja e gjithësecilit, i një ndërmarrje, i një skuadre sporti, lere më partie politike, duhet të marrë qëndrim dhe të mbajë qëndrim, qoftë në raport me arsyen pse u votua nga qeveria e PD në KiE ajo rezolutë, e bazuar në raportin e Dick Marty, qoftë dhe roli i tij.
Unë thjesht them që i bishtnon përballjes me të shkuarën e tij, ballafaqimin me publikun duke e kthyer çdo rast kur duhet t’i shpjegohet publikut si përfaqësues i popullit shqiptar, për të thirrur për komplot, konspiracione dhe për t’i akuzuar dëshmitarët nga Kosova si mashtrues”, tha Rama. /tesheshi.com/
