Benedikt Howedes do t’i kushtojë Juventusit 15 milionë euro. Skuadra bardhezi ka gjetur kështu mbrojtësin e shumëkërkuar, ndërsa nga ana tjetër, Shalke do të arkëtojë shumën e kërkuar.
Bisedimet dhe akordi janë mbyllur mbi bazën e 3.5 milionë eurove për huazimin 1-vjeçar dhe 11.5 milionë euro të tjera, në rast se gjermani 29- vjeçar do të bindë totalisht stafin teknik dhe drejtuesit. Ndërkohë, lojtari do të fitojë në Torino, sipas akordit, 4 milionë euro në sezon.
Benedikt Howedes i luajti të gjitha minutat e mundshme me Gjermaninë në Botërorin e fituar të vitit 2014: 90 minuta kundër Portugalisë, Ganës, Shteteve të Bashkuara të Amerikës, Francës e Brazilit, si dhe 120 minuta ndaj Algjerisë në 1/8-at, ashtu sikurse 120 minutat e finales ndaj Argjentinës.
Në festën pas fitores kundër Argjentinës, Howedes festoi gjithë natën së bashku me Rihanën. Pak orë më pas ai postoi në “Instagram” edhe një foto me këngëtaren.
Më 10 shkurt 2016, pasi ai refuzoi oferta nga Italia dhe Anglia, Benedikt Howedes rinovoi kontratën me Shalken deri në vitin 2020 dhe tifozët e klubit e vlerësuan besnikërinë e tij edhe me një banderolë gjigante në stadium.
Bashkëshortja e Howedes është Liza Veseler. Të dy janë njohur që në adoleshencë, në vitin 2008, dhe që nga kjo kohë nuk e kanë lëshuar më njëri-tjetrin.
Nëse nuk do të ishte bërë futbollist, dëshira e dytë e mbrojtësit gjerman 29-vjeçar ka qenë ajo e të qenit një fizeoterapist.
Howedes ka një qen shumë të bukur të racës Eurazier. Është një femër me emrin Somer, emër që në gjermanisht nënkupton verën (stinën).
Pjata e preferuar e Howedes është pure me patate dhe bizele.
Kur e kanë pyetur se cili është lojtari më i fortë që ka parë në karrierën e tij, ai u përgjigj pa hezituar, “Mesi”. Dhe kush e di që debutimi i gjermanit me fanellën e Juves të mos jetë pikërisht në “Kamp Nou”, në Champions, përballë Barcelonës së “pleshtit”.
Benedikt Howedes ka shënuar 35 gola me bluzën e Shalkes, me mbrojtësin që ka deklaruar se goli më i bukur ka qenë ai kundër Bajernit të Mynihut, në sezonin 2014- 2015.
Mes 5 golave të Howedes në Champions, njëri prej tyre ka pasur shije të veçantë, i realizuar kundër Interit kampion Europe në fuqi, në vitin 2011, në ndeshjen e kthimit të çerekfinaleve të Champions-it, fitore 2-1 në shtëpi, pas suksesit 5-2 në Milano, në sfidën e parë. /tesheshi.com/
