Shtëpia botuese Logos-A është një nga më të mëdhatë në gjirin e shqiptarisë. Kjo shtëpi botuese me vite të tëra ka dhënë një kontribut jashtëzakonisht të madh në zhvillimin e personalitetit të njeriut dhe shoqërisë; ka dhënë kontribut për idealet kombëtare dhe fetare, duke bërë kështu që të jetë një prizëm i dritares për pasionin dhe botën e shkencës. Së fundi, kemi qenë dëshmitarë që shumë intelektualë janë solidarizuar ndaj padrejtësive dhe etiketimeve të ndryshme që po i bëhen këtij opusi shkencor. Orkestrimet e ndryshme që vazhdojnë dhe mundohen që ta njollosin shtëpinë e madhe Logos-A pa dyshim se kanë prapavijë politike, janë mediokre dhe të orkestruara nga qarqe të ndryshme, të cilat nuk ia duan të mirën shoqërisë shqiptare.
Duhet cekur se në kohën e aparteidit që mbretëronte në Kosovë dhe në viset e tjera shqiptare, kjo shtëpi botuese ua hapi derën shumë autorëve, shumë librave të ndryshme, që pasuruan dhe begatuan galerinë e kombit shqiptar. Sot ky opus i shkencës “ka arritur të nxjerrë në dritë rreth 500 tituj (mbi 3.000.000 ekzemplarë) të sferave të ndryshme të dijes. Nga këta, mbi 250 tituj janë të përkthyer nga turqishtja, anglishtja, frëngjishtja, boshnjakishtja, serbokroatishtja, arabishtja e maqedonishtja, ndërsa rreth 250 tituj të tjerë janë vepra origjinale”. (shih: http://logos-a.com/index.php?route=information/information&information_id=4)
Pra, kjo lë të nënkuptohet se Logos-A ka qenë dhe vazhdon të jetë një përkrahëse e madhe e dijes, pasionit dhe shkencës, duke bërë kështu që me kreativitetin e saj të marrin dije shumë gjenerata, të edukohen breza të rinj, të cilët janë e ardhmja e shoqërisë. Në kohën kur zhvillimi i shkencës, teknologjisë dhe informatikës ka evoluar dhe shumë autorë, shumë libra, promovohen anembanë botës, shohim se qarqe të ndryshme politike në bashkëpunim me pseudointelektualët përdorin mjete dhe instrumente të ndryshme për ta tjetërsuar dhe çrrënjosur një shtëpi të dijes. Në aspektin psikologjik, ky rast do të trajtohej si çrregullim i personalitet, egocentrizëm dhe servilizim për shkak të ndikimit të një sërë faktorëve, në mesin e tyre edhe faktorit të lakmisë, si dhe askund në vendet e konsoliduara demokratike nuk ndodh një gjë e tillë, të paktën jo në shekullin XXI. Libri konsiderohet si miku më i mirë i një njeriu, kurse shtëpitë botuese dhe libraritë janë “hartë kognitive” që ngrejnë në piedestalet më të larta një shoqëri, një komb dhe një shtet, gjë që e ka vërtetuar kjo shtëpi botuese përmes punës së saj.
Logos-A, opus i padiskutueshëm në galerinë e bibliotekës shqiptare
Shoqëria akceptohet si grup i njerëzve që përfshin një bashkëveprim të vazhdueshëm social, dhe ka modele të marrëdhënieve midis individëve që kanë një kulturë dhe institucione të veçanta. Logos-A është pikërisht elementi kyç që lexuesit shqiptar i ka sjellë një kulturë komunikimi me botën e librit dhe të shkencës, me njohjen e diversiteteve të kulturave të ndryshme, duke botuar dhe përkthyer shumë libra të cilat e kanë pasuruar galerinë e bibliotekës së lexuesit shqiptar. Përmes këtyre botimeve janë fuqizuar shumë institucione, e në veçanti ai i familjes, moralit, kulturës, kombit, fesë, shkencës dhe dijes. Sot bota intelektuale shqiptare solidarizohet dhe qëndron stoike me opusin e galerisë së bibliotekës shqiptare Logos-A, si dhe e përkrah punën e saj të drejtë pavarësisht presioneve, etiketimeve dhe vështirësive në rrugëtimin e vet. Pra, kjo shtëpi botuese mbetet një opus i padiskutueshëm në galerinë e bibliotekës shqiptare dhe një energji që e ka fuqizuar rolin e kulturës së leximit dhe ngritjen intelektuale të shoqërisë shqiptare. /tesheshi.com/
