Një ish-drejtues policie i tha Top-Channel se sipas disa të dhënave, 2016-ta shënonte sasinë më madhe të kanabisit të mbjellë në gjithë territorin shqiptar. Madje ai tha se të dhënat flisnin dhe për implikim të efektivëve të policisë në mbjelljen dhe kultivimin e bimës, e cila po i shndërrohet Shqipërisë në një simbolikë kombëtare, para gjetheve panoramike të së cilës gjithnjë në lulëzim, shqiponja në flamur duket e mjerë.
Lajmet mbi plantacione kanabisi të zbuluara nga policia, janë bërë tashmë rutinë. Dhe mbi të gjitha, ato e kanë zgjeruar gjeografinë, sa në jug e sa në veri.
Ç’po ndodh?! Si mundet që Lazarati, aksioni i pazakontë policor mbi atë fshat, por mbi të gjitha mbi kanabisin dhe zejen e kultivimit dhe shpërndarjes, të mos ketë asnjë efekt psikologjik tek të tjerët përreth, afër ose larg?!
Si mundet pra që Lazarati mos jua ndalë dorën kultivuesve, por t’jua bëjë më aktive atë?!
Në fakt, ky ka qenë një paralajmërim lazaratas pas aksionit të famshëm të qershorit të dy viteve më parë, që mbylli përfundimisht rubinetat e kanabisit në fshat: se ishte thjesht një zhvendosje, nga Lazarati për të tjera vende. Dhe siç po shihet qartë, kjo “profeci” e të dëshpëruarve të fshatit legjendar është bërë realitet.
Por kjo provokon të tjera pikëpyetje. Nëse është vërtet kështu, përse autoritetet e Rendit raportojnë për çdo parcelë të zbuluar?! Nuk besohet që ata mos ta kuptojnë se sa do që të informojnë publikun, aq më tepër kjo do t’u kthehet pas në dëm të tyre, edhe nëse e kanë në funksion të propogandës për luftën kundër drogës.
Pikëpyetje tjetër e madhe është fakti se, nëse vërtet kultivimi i kanabisit është rritur, përse nuk reflektohet kjo në treg?!
Duhet kuptuar, dhe po ashtu duhet pranuar me dhimbje që droga, trafikimi i saj, kanë qenë një ndër bazat e ekonomisë së kriminalizuar shqiptare, e jo vetëm nga informaliteti.
Fjala vjen, mbyllja e Lazaratit ka dhënë një efekt të fortë negativ në të gjithë jugun e Shqipërisë, aty ku më së shumti qarkullonte paraja e saj.
E nga ana tjetër, nëse policia thotë se mbjellja e kanabisit ngado, është thjesht një përpjekje e dëshpëruar e lazaratomanëve për ta vijuar me çdo çmim zejen e tyre fitimprurëse, sërish është e pamundur të kuptohet që kjo përpjekje është e pastrukturuar, pra aq e vetmuar në kurajon e vet, për të guxuar që t’u qepet maleve dhe kodrave për t’i bërë ato pjellore si dhe fushat…me kanabis.
Dy vjet pas Lazaratit, qeveria e ka për obligim të na sqarojë së ç’po ndodh, se pse Lazot e drogës janë përhapur gjithandej nëpër Shqipëri, dhe se ku e ka burimin e frymëzimit vendosmëria e tyre për të qenë fermerë shembullore të bimës famëkeqe.
Përndryshe le ta mbajë xanxën e një qeverie që ja mbjellin dhe ja trafikojnë drogën para hunde, sigurisht me një apo të dy sytë e mbyllur prej saj, por së paku të dijë të kanalizojë të ardhurat.
Drogë po e para jo, sikur nuk shkon! /tesheshi.com/
