Thonë se shpresa vdes e fundit! E kështu, historikisht njerëzit besojnë se e nesërmja do të jetë më e mirë se sot. Vetëm kjo i mban gjallë. Njerëzit besojnë në Zot, besojnë në fjalën e dhënë, besojnë rëndom edhe edhe në liderët politikë, për fat të keq.
Po marr shkas nga aktualiteti politik nën frymën zgjedhore për kreun e FRPD-së. Si çdo i ri që aspiron, shpreson dhe do që të besojë tek një forcë politike, do të doja të besoja edhe unë. Do të doja të besoja se edhe lideri i PD-së që është i ri në moshë, i kupton dëshirat që kanë të rinjtë e pamundësitë me të cilat ndeshen çdo ditë.
Pamundësitë ekonomike për t’u shkolluar, pamundësi punësimi prej politikave të dobëta të integrimit të rinisë në tregun e punës etj., barriera që ia zbehin shpresën dhe dëshirën për të frymuar në këtë vend. Më dhemb fort që miqtë e mi ikin çdo ditë një e nga një nga ky vend. Më dhemb fort tek i shoh në kafe, bosh e pa asnjë ide. Me dhemb fort tek i shoh e i dëgjoj tek komentojnë kandidatura të rinjsh për kreun e FRPD-së për t’iu shërbyer ju z. Basha e jo ne.
Ju keni një praktikë moderne z. Basha, ne dukje integruese dhe europiane, përsa i takon kandidimeve. Në këtë rast zgjoni shpresë të atyre që aspirojnë dhe besojnë, bëheni mendjehapur dhe vizionar si lider.
Artikulimet tuaja për garë të ndershme dhe se kandidatët kanë mbështetjen tuaj, ju bëjnë sa interesant aq edhe qesharak. Të njëjtën strategji ndoqët në zgjedhjet për kryetar të partive në degët në rrethe, për kandidaturat për kryetarët e bashkive, e sot për kreun e FRPD-së në qendër e në rrethe.
Parti për të tërë, bashki për të tërë e Basha për të tërë…zemërgjerë. Fenomen tashmë i përhapur në të gjitha degët nga ata që i mbështesni dhe i inkurajoni ju z. Basha.
Treshja që merr zemër e që po sundon Shkodrën, Çobaj – Uldedaj – Hila, kanë kapur në dorë frenat e të rinjve. Të etur e të pangopur për pushtet, kanë kapluar çdo qelizë të Forumit Rinor lokal, po përdorin çdo mënyrë e lidhje të turpshme për të patur në krye të forumit atë që do t’u shërbejë për pushtetin e tyre. Kjo treshe po kontrollon çdo lëvizje në Shkodër, po paralizon frymëmarrjen e PD-së, po pengon çdo mbarëvajtje të punës së Bashkisë Shkodër.
E të rinjtë nuk kanë faj, sepse kërkesa minimale për të patur një vend pune i ul në gjunjëzim para shumë tresheve si kjo e Shkodrës. Kësaj radhe do e vuajnë garën të rinjtë e do të dalë në krye ai/ajo që do të jetë afër kryetarit Çobaj, ose e preferuara e të afërmve të Uldedajt, apo e kapobeut Hila.
Largoni këtë treshe nga kandidimi i pastër i te rinjve përpara se t’u largohen të rinjtë nga strukturat, të gjithë ata pra që aspirojnë e besojnë tek një garë e ndershme. Kjo epidemi është në çdo rreth, e unë sot ju solla vetëm Shkodrën e cila po vuan nga tentakulat e treshes grabitës pronash, pushtetarë 25-vjeçare e ish-sigurimsa.
Bukur boll besa: I rreh e nuk i le të qajnë kandidatët!
Kjo sjellje ju ka bërë me shumë se qesharak, z. Basha! Kjo praktike nuk ju çon askund, veçse në gjymtim të radhëve të PD-së. Në çdo degë po kandidojnë ato personazhe që janë afër kryetarëve të degëve në rrethe, që hiqen si të rinj e te reja me performancë, që u binden zërave të kryetarëve, që servilosen pa filluar mirë karrierën, e që bindja e tyre se Lulzim Basha do i mbështesë do shuhet shumë shpejt, sepse ju tashmë listën e fituesve e keni në sirtarin tuaj.
Nuk ke faj, sepse edhe ti vetë e dije se do jesh në krye, e dije se gara ishte lojë rrenash, e dije se je i fituari. Gara ishte e fituar para se të fillonte, prandaj opozita s’ka zë, është e mekur. Kur të zhgënjehen të rinjtë e ke humbur davanë! Lojë rrenash!
Mund t’i nxjerr para jush emrat e fituesve, por po i lë miqtë e mi të ëndërrojnë e të shpresojnë se shpresa vdes e fundit. Le të qëndrojnë edhe disa ditë më shumë në kafene që të shpalosin platformat rinore, sepse çdo eksperiencë të bën mirë.
Nga çdo betejë del më i fortë, e mëson ta shikosh realitetin ndryshe. Dashtë Zoti nuk del në krye një dobiç i treshes së uritur e i çdo tjetër të pangopuri në çdo degë. /tesheshi.com/
