Pronarë mjetesh lundruese në Vlorë kanë dalë në protestë, pasi iu është ndaluar puna qëshse Policia kaloi në ekstremin tjetër, atë të bllokimit të çdo mjeti, pas ngjarjes tragjike në Himarë.
Ata thonë se bllokimi i tyre në kulmin e sezonit turistik i penalizon, pasi kanë taksa dhe fatura për të paguar dhe nuk ia dalin dot t’i paguajnë, pasi janë kredimarrës dhe e kanë lakun në fyt nëse nuk punojnë.
Sipas tyre, mjetet dhe lundrimi po bllokohen pa arsye për shkak të një aksidenti, pasi ata kanë të rregullta dokumentet, paguajnë taksa dhe sigurime shoqërore.
“Bashkohemi me dhimbjen e familjes që humbi vajzën në atë aksident tragjik, por si pasojë e saj na kanë bërë një padrejtësi që po na lë pa bukë. Nëse vrau njëri dikë duhet ta pësojmë neve? Këta po ruajnë postet e tyre për të ushqyer fëmijët e tyre, por ne t’i lëmë rrugëve? Si të paguaj kredinë, si t’i jap rrogën punonjësve?”, tha protestues, pronar mjeti lundrues që prej ditësh s’mund të punojë.
Një autoritet i Policisë Kufitare u tha se shumë shpejt do iu zhbllokohen mjetet pas një kontrolli dokumentacioni.
“Jeni dëshmitarë çfarë ndodhi prandaj duhet marrë masa”, tha ai. /tesheshi.com/
