Nga data 18 prill, personat që posedojnë lejet ilegale të njoftimit(ID Karta), të lëshuara nga struktura paralele të Serbisë në Kosovë, nuk do të lejohen të hyjnë dhe dalin nga Kosova.
Ministrja për Dialog, Edita Tahiri, bëri me dije se pas shumë përpjekjesh në kuadër të dialogut të Brukselit që të ndalet dukuria e përdorimit të lejeve ilegale, ende ka raste kur ato shfaqen nga përdorues të ndryshëm.
“Në dhjetor të vitit të kaluar, kemi aplikuar masën e ndalesës për lejet ilegale dhe me kërkesën e Bashkimit Evropian kemi suspenduar këtë masë që t’i japim mundësi BE-së ta zgjidh këtë çështje”, – tha Tahiri.
Ajo shtoi se pavarësisht angazhimeve ndërmjetësuese të BE-së, ky problem ka vazhduar, duke qenë se ende ka raste të kësaj dukurie të përdorimit të lejeve ilegale nga persona të ndryshëm.
“Nga data 18 prill 2016 do të aplikohet masa e ndalesës për personat që tentojnë të hyjnë dhe dalin në Republikën e Kosovës me leje ilegale. Për këtë masë ndalesë jemi marrë vesh me BE-në si dhe paraprakisht e kemi njoftuar BE-në për vendimin dhe datën e rikthimit të masave ndaluese”, tha ministrja Tahiri. /tesheshi.com/
