Edi Rama ia ka dalë që pas 11 vjet të largojë thuajse totalisht nga Asambleja Kombëtare emrat e “vjetër” të socialistëve.
Janë shpallur pak pas mesditës anëtarët e rinj të forumit më të lartë të Partisë Socialiste, të cilët u zgjodhën nga Kongresi. 175 anëtarët e Asamblesë janë zgjedhur me votim të fshehtë nga 1500 delegatët e kongresit socialist. Rezultatet e votave i ka bërë publike emër për emër sekretari organizativ i PS-së, Blendi Klosi.
Bien ë sy se anëtarët e rinj të Asamblesë Kombëtare janë gjysma femra. Klosi e cilësoi këtë proces si demokratik dhe transparent
Në rrethet kryesore të vendit nuk firgurojnë emrat e atyre që kanë drejtuar partinë në vite. Kështu në Shkodër për shembull nuk figuron emri i Keti Bazhdarit, kandidates për kryetare bashkie. Në Dibër nuk ekziston asnjë prej krerëve të pushtetit vendor të zgjedhur nga PS-ja por edhe të deputetëve. E njëjta gjë në qarqe të tjera.
Ndërkaq nga ana tjetër firgurojnë thuajse të gjithë drejtorët e rëndësishëm të emëruar pas 23 qershorit 2013, të cilët nuk kanë qenë deri tani të organizuar në PS.
Por tek tuk ka edhe ndonjë prurje të re që ka lidhje me të vjetrën, madje “të lashtën”. Në qarkun e Lezhës figuron Marie Bine, ish-kreu i bashkisë apo mbesa e Bardhok Bibës, një emër që ka lidhje të fortë me të majtën në rrethin e Mirditës.
Kongresi i Partisë Socialiste mbylli procedurat finale të zgjedhjes së anëtarëve të organit më të lartë të kësaj force politike siç është Asambleja Kombëtare. Më pas anëtarët e rinj të asamblesë do të mblidhen sa më shpejt për rifreskuar totalisht kupolën drejtuese të socialistëve shqiptarë.
Asambleja e re e Partisë Socialiste do të mblidhet në fillim javë për të zgjedhur kryesinë qëndrore të saj dhe më pas për të vendosur parimet e përgjithshme të referendumit të 6 prillit.
Sapo të legalizohen 175 anëtarët e rinj të Asamblesë Kombëtare, ata do të votojnë në mënyrë të fshehtë për kryesinë e re që përbëhet nga 28 anëtarë plus kryetarin që hyn direkt 29.
Do të jetë kryesia e re e socialistëve që më pas do të zgjedhë ekipin e ri ekzekutiv drejtues që do të bëhet nga një Sekretar i përgjithshëm dhe nga disa sekretarë sipas sektorëve përkatës.
Siç mësohet kryesia do të kërkojë nga Komisioni i Garancive Statutore ngritjen e komisionit zgjedhor për referendumin dhe më pas do të hartohet fleta e 6 prillit që pritet të përmbajë vetëm një pyetje të vetme: a e votbesoni ju punën e deritanishme të kryetarit të PS-së dhe Kryeministrit të Shqipërisë.
Kongresi i Partisë Socialiste ka miratuar që më 9 prill do të zhvillohet referendum për votbesimin e kryetarit të partisë: Edi Rama.
/tesheshi.com/
