Një dekladë më parë, Andrew Wakefield u bë gazi i botës. Ish-doktori britanik kishte nisur një fushatë kundër vaksinimit nga fruthi shytat dhe rubeola (MMR Vaccine), duke bërë “lidhje” mes vaksinimit dhe autizmit. Studimet e tij ishin zhvlerësuar me kohë, por pasojat mbetën.
I dëbuar nga Këshilli i Përgjithshëm Mjekësor në vitin 2010, Wakefield u bë gjithnjë e më i refuzuar në komunitetin mjekësor. Fatkeqësisht, lëvizja e vetëthirrur kundër vaksinimit nuk ndaloi këtu.
Me kalimin e kohës, Wakefield ka rinisur jetën e tij profesionale dhe personale në SHBA. Mediat thonë se ai është duke jetuar me një modele të njohur, e cila është aktiviste e “mirëqenies dhe stilit të jetës” .
Ndonëse ai nuk e praktikon mjekësinë në SHBA, ai ende i lartëson pikëpamjet që ia shkatërruan karrierën në Britani.
Pasi u zhvendos në Teksas, ai e gjeti një tokë pjellore për qëndrimet e tij. Tashmë llogaritet që vetëm në vitin 2016, më shumë se 45,000 nuk janë vaksinuar nga vaksina MMR, e cila parandalon sëmundjet si fruthi, shyta dhe rubeola.
Fruthi është potencialisht vdekjeprurës dhe mund të shkaktojë dëme serioze në trurin e një fëmije. Edhe nëse fëmijët e kalojnë atë pa pasoja, megjithatë është tejet e pakëndshme dhe e panevojshme për t’u shfaqur meqenëse ekziston vaksina.
Kujtoj se si i kam kaluar më shumë se një javë në shtrat si fëmijë, i bllokuar në një dhomë të errët dhe duke u dridhur si thupra në ujë nga ethet e tmerrshme.
Ende mendoj se si gjeneratat e reja, veçanërisht në botën perëndimore, janë joshur nga ideja e mosvaksinimit, kur nuk ka pasur asnjë studim që e ka lidhur vaksinimin me ndonjë sëmundje.
Puna e këtij doktori famëkeq nuk mbaroi vetëm me mosvaksinimin e dhjetëra mijëra fëmijëve, por edhe me krijimin e fushatave në internet, e që kush e di se me çfarë qëndrimesh mbarojnë.
Interneti padyshim ka luajtur një rol të madh në ngritjen dhe fryerjen e kësaj figure që shpërndan ide të rrezikshme dhe të papërgjegjshme.
Pasojat tashmë janë shfaqur në horizont.
Numri i rasteve me fruth është dyfishuar në vitin 2018, dhe e gjitha kjo si pasojë e fushatave të pandërgjegjshme që bëjnë thirrje për mosvaksinimin e fëmijëve.
Rreziku që një ide e tillë të kthehet “në modë” është tjetet e rrezikshme, dhe shumë shpejt mund të bëhet e pakontrollueshme.
Njerëzit e pëlqejnë atë që është në modë, dhe absorbojnë ide që u pëlqejnë. Duke qenë se është arritur një “ngopje” nga modernizimi dhe përpunimi i gjithçkaje, ka shumë të tillë që çështjen e vaksinimimit e shohin si një marrëveshje të kompanive farmaceutike, dhe e lidhin edhe me teori konspirative.
Por le të kthehemi te faktet. Miliona jetë njerëzisht janë shpëtuar gjatë viteve të fundit si rezultat i punës së vaksinimit. Sot, në mbarë botën, njerëzit japin kontribute monetare që vaksinat të depërtojnë edhe në cepet më të panjohura të botës.
Problemi i aktivistëve anti-vaksinim nuk është adresuar ende, pasi me gjasë ende nuk shihet mirë rreziku që e paraqesin.
Ndërsa bota ndryshon në çdo rrotullim të saj dhe priten ende zbulime të mëdha që shpëtojnë jetë, shumë individëve dhe lëvizjeve sharlatane iu jepet hapësira për të shfaqur ide regresive, E vërteta është se idetë regresive nuk mund të zhduken si me shkop magjik.
Në këtë epokë kur ne kalojmë me orë të tëra të lidhur me botën në internet, saga e anti-vaksinimit vazhdon të shkaktoj plagë në jetën bashkëkohore.
Në të kaluarën, institucionet dhe rregullatorë të shumtë kanë qenë si një mur mes publikut dhe ideve të këqija, por tani efekti i tyre është zbehur.
Sharlatanizmi i një doktori për faqe të zezë si Wakefields nuk do të duhej të ngrihej, e as të promovohej, në mënyrë që të mos bëhen dëme që tashmë janë bërë.
Në anën tjetër, duhet që njerëzve vazhdimisht t’u kujtohet se si ishte situata para vaksinave, kur vdekja e fëmijëve nga një sëmundje ngjitëse ishte më tepër se përditshmëri. /tesheshi.com/
