Parlamenti izraelit (Knesset) miratoi të hënën zgjatjen edhe për një vit të ligjit të përkohshëm që parandalon ribashkimin e familjeve palestineze.
Ligji i referohet bashkimit familjar dhe bllokon të drejtën automatike të shtetësisë izraelite, apo qëndrimit në atë vend për palestinezët në bazë të martesës me shtetas izraelitë, raporton Anadolia.
Rinovimi i ligjit u miratua me 20 vota pro në krahasim me nëntë kundër, thuhet në deklaratën e Knesset.
Ai ligj, i miratuar në vitin 2003 në vazhdën e Intifadës së Dytë, kryengritjes palestineze kundër pushtimit, rinovohej çdo vit.
Ligji zbatohet kryesisht për palestinezët që jetojnë në Jerusalemin Lindor ose Izrael, të cilët janë të martuar me palestineze nga Bregu Perëndimor ose Gaza. Ligji i ndalon këto familje të marrin leje qëndrimi në Izrael.
“E kundërta e demokracisë”
Sipas ligjit, ministri i Brendshëm nuk lejohet t’i japë nënshtetësinë ose qëndrimin në Izrael asnjë shtetasi të Irakut, Iranit, Sirisë dhe Libanit.
Anëtari i Knesset-it, Iman Khatib-Yasin e përshkroi rinovimin e ligjit si “të kundërtën e plotë të demokracisë”.
“Ky në vetvete është racizëm. Sa herë që duhet të rinovojnë vendbanimin e tyre të përkohshëm, ata i frikësohen momentit që do t’u thuhet të largohen dhe të ndahen nga bashkëshortët ose fëmijët e tyre”, tha Khatib-Yasin.
Sipas organizatave joqeveritare palestineze dhe izraelite, ka mijëra familje palestineze për të cilat zbatohet ligji i përmendur. /tesheshi.com/
