Pas katër sfidave të dy ditëve të shkuara në Champions League, në radhë për t’u zhvilluar sonte janë tetë takimet e para të një të tetave në Europa League.
Përplasjet këtu mund të jenë të përmasave më të vogla krahasuar me ato të Champions Leagues-s, por sidoqoftë mund të dhurojnë njëlloj emocion.
Një takim i tillë i kësaj të enjteje është ai që do të zhvillohet në Lion mes skuadrës vendase me të njëjtin emër dhe Romës.
Plot shtatë gola i shënonte Lioni skuadrës holandeze të AZ Alkmarit në turin pararendës, ndërkohë që Roma eliminonte Vilarealin.
Për të mos harruar sfidën që do të luhet në Pire të Athinës, atë mes Olimpiakosit dhe Beshiktashit. Një përplasje greko-turke, e për më tepër në një stadium të njohur për atmosferën përcëlluese që krijon.
Dy prej takimeve të kësaj mbrëmjeje janë mes skuadrave të të njëjtit kampionat, Gentit dhe Genkut të Divizionit të Parë belg, e Shalkes dhe Borusias së Mynshegladbahut të Bundesligës gjermane.
Interesant është takimi mes Rostovit dhe Mançester Junajtedit; Mourinho ka mbetur tejet i pakënaqur me cilësinë e fushës ku do të luhet në orën 19:00.
APOEL – Anderleht, Kopenhagen – Ajaks dhe Selta Vigo – Krasnodar plotësojnë tetë takimet e Ligës së Europës që presin të luhen sonte. /tesheshi.com/
