Shpesh i shikojmë si popull shumë ndryshe nga gjithë popujt e tjerë të botës, të cilët kanë karakteristika sa të përbashkëta aq edhe të ndryshme nga njëri-tjetri. E kemi fjalën për eskimezët, ndaj të cilëve kemi kuriozitete të shumta. Për shembull, një nga pyetjet që shtrohet më shpesh, është se nga çfarë janë të përbëra veshjet e tyre.
Jo të gjithë e dinë se ato që mund të cilësohen si rrobat e eskimezëve, janë të përbërë nga lëkura e kafshëve, të cilat janë vrarë më parë për ushqim. Lëkura e drerëve caribou është e përsosur, pasi është e pasur me qime të shumta dhe të gjata, është e lehtë dhe siguron ngrohtësinë e dëshiruar.
Veshjet më të zakonta të eskimezëve janë gëzofët e gjatë të cilët kanë në përbërjen e tyre edhe një kapuç, pra veshje në formën e kapotës që quhen parka. Si çizme vishen dy deri në tre shtresa lëkure njëra pas tjetrës. Ato janë edhe kundër ujit. Veshjet mund të përbëhen edhe nga lëkurat e dhelprave, arinjve polar apo kafshëve të tjera me gëzof të fortë. Për të mbrojtur duart, eskimezët përdorin dorashka të përbëra nga gëzofi i dashit. Të gjitha veshjet punohen me dorë. /tesheshi.com/
