Ti hap sytë shend e gaz në mëngjes, se për ty, muslimanin, është një ditë feste…
Eshtë Kurban Bajrami, kremtimi i sakrificës njerëzore për hir të Krijuesit…
Ti rend drejt sheshit për t’iu bashkuar mijëra vëllezërve në besim, për t’u falur së bashku me ta, për të vënë kokën në sexhde njëherazi me ta…
Ashtu si ti nxitojnë shumë të tjerë, drejt së njëjtit drejtim, aty ku xhemaati gjigand pret të falë namazin e Kurban Bajramit…
Gëzimi nis e davaritet me t’iu afruar vendqëndrimit të përkohshëm të muslimanëve në këtë mëngjes të kthjellët të fundverës…
Një ekran i madh të ndihmon të shohësh imazhin e krerëve të institucionit që pretendon të drejtojë veprimtarinë fetare të shumicës së shqiptarëve, muslimanëve, por vetëm kaq. Nëse gjendesh në rreshtat prapa, e ke të pamundur të dëgjosh qartazi atë çka thonë. Çfarë të vjen në vesh është veç një zë i pazbërthyeshëm…
Ja, në ekran shfaqet dhe Ferdinand Samarxhi, e në mendje, mbi sheshin ku gjendesh, mbivendoset mali i Tomorit. Mos je në Tomor? O Zot, më fal! Mendja punon me imazhe, dhe në tëështë ngulitur Samarxhiu majë Tomorit… Po këtu çfarë do?
E keqja nuk mbaron me kaq…
Tani nuk ka më vend për gëzim… Eshtë hidhërim!
Zëri i turbullt shuhet fare kur fillon falja e namazit të Bajramit. Heshtje e plotë… Sërish është ekrani që të ndihmon të kuptosh se namazi ka filluar…
O njerëz, o rrogëtarë, as kaq nuk mund ta bëni?! Ca altoparlantë më shumë, më në rregull, e vendosur jo veç në një pikë! Kaq mjafton të bëni veç dy herë në vit, për të na e lënë gëzimin të pacenuar…
Por dhe kur zëri vjen, në rekatin e dytë, këndimi i vargjeve kur’anore është i thatë, aspak përmbushës, aspak drithërues, që të të zhvendosë nga ky realitet në mbretërinë e hyjnores…
Volumi, për çudi, bëhet i fortë në hutben pasuese, kur, si rëndom në këto kohë, pushtuar nga një fajësi asfare e pranishme ndër ne, folësi flet për atdhe…, për gjithçka, por më kot ti përpiqesh të dëgjosh makar një thënie profetike…
Dielli del e shkëlqen… Ke nevojë për ujë të ftohtë… Jo prej diellit, po prej organizatorëve të faljes së namazit të Kurban Bajramit…/tesheshi.com/
