Kryesuesi i Këshillit Gjyqësor të Kosovës, Nehat Idrizi, bën të ditur se nga 17 tetori pritet të nisë unifikimi i sistemit të drejtësisë në veri.
“Po shpresojmë që pas takimit që patën dy presidentët në Bruksel, të cilët u zotuan se do të bëhet implementimi, ne tani jemi në fazën e përgatitjeve të kësaj marrëveshjeje.
Ne po shpresojmë që më 17 tetor do të jetë gjithçka e gatshme dhe po shpresojmë që më në fund, pavarësisht disa dështimeve që janë bërë, më në fund do të bëhet implementimi i kësaj marrëveshjeje.
Këtu është edhe qëllimi kryesor, pra që të kemi një sistem gjyqësor unik në veri, që do të thotë që edhe gjyqtarët do të punojnë sipas legjislacionit të Kosovës. Gjyqtarët serbë, shqiptarë, turq dhe të tjerë do të punojnë së bashku, si në pjesën veriore po ashtu në pjesën jugore”, ka thënë Idrizi në një intervistë për Radio “Evropa e Lirë”.
Ai thotë se në pjesën veriore të Kosovës do të vendosen gjyqtarët nga çështjet penale nga të gjitha komunitetet që janë përzgjedhur, ndërkaq, në pjesën jugore, në objektin e ish-Jugobankës do të vendosen gjyqtarët e çështjeve civile si dhe departamenti penal për të mitur. /tesheshi.com/
