Lëvizja FOL, sot ka publikuar statistikat anti-korrupsion të Policisë, Prokurorisë, Gjykatave të Kosovës si dhe statistikat e Zyrës së Koordinatorit Kombëtar për Luftimin e Krimeve Ekonomike për periudhën janar-mars 2015.
Sipas të dhënave në këtë raport tregojnë se Policia e Kosovës, Prokuroria dhe Gjykatat gjatë tre mujorit të parë të vitit 2015 kanë trajtuar dhe pranuar në punë gjithsej 2286 raste kundër-korrupsion.
Nga këto lëndë Policia e Kosovës gjatë kësaj periudhe raportuese ka trajtuar gjithsej 140 raste, ku për veprën penale të korrupsionit marrje e ryshfetit ka trajtuar 7 raste, për dhënie të ryshfetit 20 raste dhe për keqpërdorim i pozitës ose autoritetit zyrtar 113 raste. Nga këto raste Policia e Kosovës ka arrestuar 22 persona.
Ndërkaq, Prokuroria gjatë kësaj periudhe ka pranuar në punë gjithsej 1375 raste, ku për veprën penale të korrupsionit marrje e ryshfetit ka pranuar në punë 38 raste dhe ka zgjidhur 7 raste, për dhënie të ryshfetit 29 raste dhe ka zgjidhur 15 raste dhe për keqpërdorim i pozitës ose autoritetit zyrtar 1308 raste dhe ka zgjidhur 79 raste.
Gjykatat gjatë kësaj periudhe kanë pranuar në punë gjithsej 771 raste, ku për veprën penale të korrupsionit marrje e ryshfetit ka pranuar në punë 86 raste dhe kanë zgjidhur 3 raste, për dhënie të ryshfetit 44 raste dhe ka zgjidhur 15 raste si dhe për keqpërdorim i pozitës ose autoritetit zyrtar 641 raste dhe ka zgjidhur 52 raste.
Po ashtu Lëvizja FOL, ka monitoruar punën dhe angazhimin e Zyrës së Koordinatorit Kombëtar për Luftimin e Krimeve Ekonomike sa i përket sekuestrimit dhe konfiskimit të pasurisë për periudhën janar-mars 2015.
Sipas disa të dhënave të Zyrës së Koordinatorit Kombëtar për Luftimin e Krimeve ekonomike tregojnë se për periudhën e parë të vitit janar-mars 2015, vlera e përafërt e pasurive të ngrira ose të sekuestruara arrin në vlerën 265.470 euro. Gjithashtu ka ngrirë, sekuestruar 15 objekte, 7 vetura, tokë (14.500 m2), 84 asete tjera. Ndërkaq gjatë kësaj periudhe janë konfiskuar pasuri në vlerë prej 64,487 euro./tesheshi.com/
