Edhe pse shkruhet cdo ditë një lajm për të, i cili të nesërmen përgënjeshtrohet, për t’u ringritur si çështje, dy ditë më vonë, shitja e mundshme e Neymar tek PSG ka këtë vëmendje, edhe për “pasojat” që mund të krijojë tek skuadrat e tjera.
Siç shkruajnë të premten mediat në Spanjë, parizienët e kanë çuar në 40 milion shifrën e të ardhurave që braziliani mund të fitojë në sezon, nëse shkon në Francë, përvec bonuseve të tjera. Drejtuesit e PSG dhe trajneri Emerih, janë gati t’i japin Neymar jo vetëm numrin që ai do, por edhe rolin që preferon në fushë, pra janë gati t’i japin pozicionin e “Mesit” në skuadër.
E nëse kjo përpjekje merr udhë dhe braziliani vendos largimin nga Barcelona, të tjerë “skenarë” vihen në lëvizje. Ndërsa mediat, për t’i dhënë sa më tepër “vërtetësi” hamendësimeve që bëjnë, apo deduksioneve që arrijnë, për shkak të ndonjë “pëshpërime” që del nga klubet e futbollit, “propozojnë” në publik, “zëvendësimin” e Neymar (nëse shkon në Paris) me Dybalën e Juventusit; dhe “gropën” që argjentinasi mund të krijojë tek Juve, mediat përpiqen “ta mbushin” me Bernadeschin, i cili sapo është blerë nga kampionët e Italisë.
Por nëse ndodh kështu, Juventus ka të gjithë të drejtën të pretendojë edhe ndonjë lojtar të Barcelonës si kundërlëvizje, vecanërisht në mesin e fushës, ku trajneri Alegri kërkon forcë dhe fantazi. E në këtë rast, kush nuk do ta donte Serxhio Busquets-in. Thënë me pak fjalë, nëse Neymar pranon ofertën rekord të PSG, praktikisht merkatoja e verës, ristarton veten. /tesheshi.com/
