Braziliani “i zhurmshëm” Neymar bën lajm sa herë që lëshon një top nga këmba, por edhe një fjalë nga goja.
Largimi i tij drejt PSG ishte jo vetëm bomba e merkatos së këtij viti, por vazhdon të bëjë jehonë kudo në Europë.
E për t’i “lehtësuar” disi plagët e kësaj bombe, ka menduar vetë sulmuesi, i cili pas ndeshjes debutuese në Francë, ku shënoi një gol dhe dha një asist për Kavanin, është shprehur shumë i lumtur, ndërkohë që Barcelona “e tij”, mundej në Kamp Nou nga armiqtë e Realit të Madridit.
“Njerëzit e lidhin largimin nga Barcelona me vdekjen, por unë ndihem më i gjallë se kurrë”, është shprehur braziliani për mediat.
Duke qenë koshient për tronditjen që do të shkaktonte largimi i tij nga Barcelona, Nejmar theksoi se ndihet fare i qetë dhe se është përqëndruar tërësisht tek skuadra e tij e re.
Madje edhe fjalët e tij përmbyllëse për mediat, janë komentuar si “shigjeta” të lëshuara drejt klubit katalanas të Barcelonës, apo edhe vetë Mesit: “jam i kënaqur me ndeshjen e parë. Trajneri më la të luaja në një rol më të lirë, që më pëlqen shumë, pas sulmuesve”.
Natyrisht, këtë pozicion tek Barcelona e ka mbajtur Mesi, i cili është edhe “shefi” i skuadrës, e njëkohësisht, lojtari i paprekshëm rreth të cilit duhet luajtur e gjithë loja. Për këtë, mediat e konsiderojnë “rilindje”, lëvizjen e Neymar drejt PSG. /tesheshi.com/
