Sulmuesin brazilian dhe shokët e tij të Barcelonës kanë një të përpjetë të fortë të mërkurën e 19 prillit, kur do të presin në “Camp Nou” Juventusin në ndeshjen e kthimit të çerekfinaleve të Champions League-s.
Fitorja e thellë 3-0 e torinezëve në ndeshjen e parë e bën shumë të vështirë për katalanasit, por Neymar beson gjithsesi, duke patur në mendje dhe kualifikimin historik ndaj PSG-së.
Ai mendon se lojtarët e Barcelonës nuk kanë asgjë për të humbur.
“Duhet të japim gjithçka. Nëse gjithçka shkon mirë, mund të bëjmë një tjetër përmbysje. Besoj në ekipin tonë, besoj në potencialin tonë. Nuk kemi asgjë për të humbur, dhe kemi gjithçka për të fituar. Duhet të hyjmë në lojë të vendosur për të bërë punën tonë dhe për të fituar,” ka thënë Neymar për mikrofonin e një kanali sportiv.
“Eshtë shumë e vështirë, sepse duhet përmbysur një epërsi e madhe. Juventusi është një ekip i madh, i organizuar mirë, çka e bën dhe më të vështirë kthimin në lojë. Duhet të vrapojmë dyfish nga ç’bëjmë normalisht.”
Dhe ja ku vjen krahasimi me PSG-në për Neymar-in: “Jemi në të njëjtën situatë që ishim ndaj PSG-së. Kemi 1% mundësi për t’u kualifikuar, dhe pjesa tjetër, 99%, do të jetë besim, vrapim dhe fat. Kjo është e vetmja mënyrë që të vijnë golat.” /tesheshi.com/
