Ish-kryetari i Kuvendit të Kosovës, Nexhat Daci, i ka kritikuar për papjekuri dhe mungesë guximi liderët politikë dhe deputetët, të cilët po e zvarrisin konstituimin e institucioneve.
Ndërsa të pamoralshme, ai e quan dhe kërkesën e Vetëvendosje-s që koalicioni PAN, të ndërrojë kandidatin për kryetar të Kuvendit.
“Kjo lojë që po bëhet me Kosovën është papjekuri politike e deputetëve dhe liderëve të partive politike.
Është një lojë që nuk i bën mirë askujt. Befasohem me papjekurinë e liderëve politikë, në radhë të parë, dhe me mungesën e guximit të lirisë të deputetëve që janë zgjedhur në parlament. Nuk është as e drejtë as e moralshme. Por morali në politikën ballkanike nuk ekziston.
Është gazmore kur të zotit të shtëpisë ju i thoni që nuk je. Ku keni parë ku keni dëgjuar, në cilin vend ndoshta, që t’i thuash kryetarit të një partie që i ka fituar zgjedhjet në koalicion, apo si i ka fituar zgjedhjet, ta kushtëzosh që t’i nuk mundesh të jesh, por mundet të jetë dikush tjetër prej partisë tënde”, ka thënë Daci, në një bisedë për “Ekonomia Online”.
Ish-kryeparlamentarit Daci nuk i ka pëlqyer shumë as drejtimi i seancës konstituive nga deputeti më i vjetër në Kuvend, Adem Mikullovci. Ai tha se në Kuvend ka rregulla, të cilat duhet të respektohen.
