Prestigjozja amerikane i ka kushtuar një shkrim debatit më të madh në opinionin francez e jo vetëm, atij mbi një veshje plazhi të quajtur “burkini”, e përdorur nga femrat muslimane.
Me titullin “Franca dhe ndalesa e ‘burkinit’”, New York Times jo vetëm informon, por dhe mban një qëndrim të caktuar, ku mes rreshtash e konsideron si pak absurd vendimin e autoriteteve franceze për t’i privuar femrat e një kategorie që të dalin me veshjen që dëshirojnë në plazh.
Dhe kjo në vendin që e konsideron veten kampion të të drejtave dhe lirive njerëzore.
Mirëpo si i shohin francezët këto liri e të drejta në rastin e veshjes së femrës muslimane, në plazhe ose në publik?! Jo si zgjedhje e lirë e saj në bazë të konteksteve morale dhe e etike që përfaqson, por si një “imponim burrëror”(!), diçka trashësisht naive në rastin më të mirë, dhe thjesht keqdashëse në rastin më të keq…
Shkrimi:
Pas ndalimit të mbulesës së fytyrës, bartjes së shamisë në shkollë si dhe rregullat mbi gjatësinë e fustanit nëpër shkolla, problemi shumëvjeçar me veshjen e vajzave muslimane ka marrë kthesën më absurde deri më tani: atë me polemikën më të re mbi burkan, kostum ky larjeje, që është përzierje e fjalës burka dhe bikini.
Që nga e enjta, pesë kryebashkiakë francezë kanë ndaluar veshjen e burkinit nëpër plazhe, duke e quajtur atë rrezik për rendin publik të qytetarëve francez.
Kjo histeri kërcënon të stigmatizojë dhe margjinalizojë më tej muslimanët francezë në kohën kur vendi është përfshirë nga një valë e sulmeve të tmerrshme terroriste.
Dhe me zgjedhjet presidenciale të parapara pranverën e ardhshme dhe me popullaritetin në rritje të partisë së ekstremit të djathtë, “Fronti Kombëtar”, zyrtarët dhe politikanët francezë kanë dalë në mbështetje të kryebashkiakëve.
Kryeministri Manuel Valls ka quajtur të mërkurën burkinin si simptomë e “skllavërimit të femrës”, e cila nuk është në përputhje me vlerat e Francës, duke thënë se kombi duhet mbrojë veten.
Ministri për të drejtat e grave, Laurence Rossignol, deklaroi se burkini ka të njëjtën logjikë: të mbulohet trupi i femrës për t’i kontrolluar më mirë ato.
Dhe ja thotë këtë dizenjueses së burkinit, australianes Aheda Zanetti, e cila është bërë një emër tashmë të njohur në botë për një linjë kostumi banjoje për gratë të cilat duke mos dashur që të ekspozojnë trupin e tyre – për çfarëdo arsye – duan njëherësh që të shijojnë sportet e ujit dhe plazhin.
Ylli britanik i televizionit, Nigella Lawson, në vitin 2011 veshi burkinin në plazhin australian, duke çuar në mijëra kërkime në Google me emrin e saj dhe emrin burkini. Ndërkohë, bota po sheh muslimanet të cilat po garojnë me krenari në lojërat olimpike në Rio, të veshura me kostume sportive që e mbulojnë gjithë trupin.
Fakti që vetë prindërit francez po veshin gjithnjë më shpesh fëmijët e tyre të vegjël me kostume të ngjashme, me qëllim që t’i mbrojnë nga rrezet e dëmshme të diellit, e shton hipokrizinë e këtij debati.
Por në zemrën e këtij debati qëndron diçka shumë më e errët: deklaratat paternaliste të politikanëve franceze për të shpëtuar femrat muslimane nga skllavërimi, duke iu diktuar atyre çfarë mund të veshin dhe çfarë jo.
Sherri me burkinin është një mënyrë e përshtatshme për të zhvendosur vëmendjen nga problemet e pazgjidhura të udhëheqësve të Francës: papunësia e lartë, rritja e zbehtë ekonomike dhe kërcënimi akoma real për sulme terroriste. /tesheshi.com/
