Kompanitë amerikane vazhdojnë t’i paguajnë gati 1 miliard dollarë në vit agjencisë shtetërore bërthamore të Rusisë Rosatom për të blerë uranium të pasuruar, i cili është një nga flukset më të rëndësishme të parave nga SHBA në Rusi që nga fillimi i pushtimit të Ukrainës, shkruan The New York Times.
Pavarësisht përpjekjeve të aleatëve perëndimorë për të ndërprerë lidhjet ekonomike me Moskën, Uashingtoni vazhdon të blejë nga Rusia uraniumin e pasuruar që prodhon më shumë se gjysmën e energjisë pa karbon të SHBA-së, me pagesa të bëra përmes filialeve të Rosatom.
Arsyeja pse SHBA-të vazhdojnë të blejnë uranium të pasuruar nga Rusia është fakti se nuk ka asnjë kompani amerikane që merret me pasurimin e uraniumit.
Gazeta amerikane kujton se marrëveshja për blerjen e uraniumit të pasuruar midis Rusisë dhe SHBA-së, pas rënies së Bashkimit Sovjetik, i mundësoi Moskës të merrte gjysmën e tregut global, ndërsa SHBA-të e ndërprenë plotësisht pasurimin e uraniumit.
Importi, jo vetëm SHBA por edhe dhjetëra vende të tjera
Një problem shtesë është se ndërtimi i një zinxhiri të ri furnizimi me uranium të pasuruar do të kërkonte vite dhe ai zinxhir do të kërkonte shumë më tepër para sesa qeveria amerikane po shpenzon aktualisht për importe.
Sipas The New York Times, rreth një e treta e uraniumit të pasuruar të përdorur në SHBA importohet nga Rusia, e cila është prodhuesi më i lirë në botë. Pjesa tjetër importohet nga Evropa dhe një pjesë më e vogël prodhohet nga një konsorcium britaniko-holandez-gjerman që vepron në shtetin e Ohajos. Konsorciumi i tha gazetës amerikane se do t’u duhej më shumë se një dekadë për të prodhuar sasi që do të ishin konkurruese me ato nga Rusia.
Në të njëjtën kohë, dhjetëra vende në mbarë botën importojnë më shumë se gjysmën e uraniumit të pasuruar nga Rusia, sipas të përditshmes së New York-ut. /tesheshi.com/
