Vite pune fshihen pas goditjes që Izraeli i ka dhënë Hezbollahut javët e fundit dhe që kulmuan të premten mbrëma me vrasjen e Hassan Nasrallah, liderit të organizatës, në një bombardim në shkallë të gjerë të kryer nga IDF në Bejrut.
Sipas New York Times, izraelitët kanë punuar në heshtje dhe metodikë që nga përfundimi i Luftës së Dytë të Libanit në 2006 për të “ndërtuar një aparat të frikshëm inteligjence” që ka depërtuar thellë në organizatën libaneze.
Raporti i gazetës tha se Izraeli kishte dërguar komando sekrete “thellë në vend” për të kryer “misione të ndjeshme të inteligjencës”, të cilat – siç rezulton – kanë qenë të rëndësishme në sulmet precize që kanë eliminuar komandantët e Hezbollahut një nga një.
Sulmi ndaj Nasrallahut “ishte shumë kompleks. Kjo tregon jo vetëm aftësi të mëdha teknologjike, por edhe se sa thellë ka depërtuar Izraeli në Hezbollah”, komentoi James Dorsey, një studiues në Institutin e Lindjes së Mesme të Universitetit Kombëtar të Singaporit.
Siç është bërë e ditur, nga Neë York Times, më shumë se 80 bomba ranë brenda pak minutash në vendin e Bejrutit jugor, ku ndodhej Nasrallah.
Izraeli nisi goditjen fatale kundër liderit të Hezbollahut, Hassan Nasrallah, pasi mësoi se ai do të takohej me komandantët kryesorë të lëvizjes së tij në selinë e tij nëntokësore në Bejrutin jugor, tha ushtria izraelite të shtunën.
Zëdhënësi i ushtrisë izraelite, gjenerallejtënant Nadav Shoshani tha se operacioni, të cilin ushtria e quan “Rendi i Ri”, u zhvillua të premten ndërsa Nasrallah po takohej me zyrtarë të lartë në organizatën e tij për të planifikuar sulme të reja kundër Izraelit.
“Ne kishim inteligjencë në kohë reale, një mundësi, një mundësi operacionale që na lejoi të kryenim këtë sulm,” u tha ai gazetarëve.
Radio Ushtria raportoi, duke cituar kreun e skuadronit të Forcave Ajrore që mori përsipër operacionin, se pilotët u informuan për objektivin pak para nisjes.
“Pilotët nuk e dinin se kush ishte objektivi në ditët kur po planifikohej goditja”, tha oficeri, i cili dha emrin e tij vetëm si “Toger M.”. Ata e mësuan objektivin disa orë para se të niseshin dhe kuptuan se ku po shkonin, shtoi ai.
Shoshani nuk pranoi të komentojë mbi spekulimet se bomba të rënda Mark 84 të prodhimit amerikan mund të jenë përdorur në sulm. Gjeneral brigade Amishai Levin, komandanti i bazës ajrore Hajerim, u tha gazetarëve se “dhjetëra raketa” goditën objektivin brenda sekondave.
Ali Karaki, kreu i forcave të Hezbollahut në frontin jugor, të cilin Izraeli u përpoq ta vriste në fillim të javës, u vra gjithashtu në të njëjtin sulm, tha Shoshani.
“Ne kemi mbledhur informacione për Nasrallah për disa vite. Për dekada ne grumbulluam informacione, duke kuptuar se në një moment ai do të përpiqej të fillonte një luftë. Ne patëm informacion në kohë reale dhe kryem sulmin”, shtoi zëdhënësi. /tesheshi.com/
