Pa u bërë një orë nga lindja e saj, 47 minuta pasi hymë në vitin 2018, vogëlushja Asel tërhoqi vëmendjen e qytetit të saj në Vjenë, si “Foshnja e Vitit të Ri” e kryeqytetit austriak.
Por, në vend të dëshirave të mira nga qytetarët që lexonin njoftimin e lindjes së saj, të shpërndarë nëpër gazetat austriake në ditën e Vitit të Ri, vajza e vogël dhe familja e saj u përshëndetën me një valë racizmi, neverie dhe urrejtje.
Njoftimet publike të “Foshnjës së Vitit të Ri”, me imazhet e prindërve tek mbanin pasardhësin e tyre të lindur pak pas vigjiljes së Vitit të Ri, janë pjesa kryesore e gazetave në të gjithë botën gjermanishtfolëse.
Por të drejtat e internetit dhe grupet mbështetëse të refugjatëve thonë se nuk kishin parë kurrë një valë urrejtjeje drejtuar një fëmije si ajo me Aselin dhe prindërit e saj, të identifikuar nga gazeta Heute si Naime dhe Alper Tamga.
“Në orët e para të jetës së saj, kjo vajzë e ëmbël tashmë ishte objektivi i një vale të pabesueshme komentesh të dhunshme dhe urrejtjes në internet”, shkruante në faqen e tij në Facebook, Klaus Schwertner, sekretar i përgjithshëm i shoqatës bamirësisë katolike Caritas.
“Është një dimension krejtësisht i ri i urrejtjes në internet, duke synuar një të porsalindur të pafajshëm”, tha ai.
Shumë nga komentet që mbushën faqet e mediave sociale austriake me foton e familjes së Aselit, të publikuar nga Shoqata e Spitalit të Vjenës, gjithashtu vunë në shënjestër nënën e foshnjës, fytyra e qeshur e së cilës ishte e rrethuar nga një shami e ndritshme ngjyrë trëndafili.
“Po shpresoj për një vdekje sa më të shpejtë të saj”, shkroi një përdorues. “Dëbojini menjëherë,” shkruante një tjetër postim në faqen e Heute, raportoi të enjten.
Shumë prej këtyre mesazheve janë hequr, por gazeta tha se po shqyrtoheshin për të parë nëse ishin shkelur ligjet kundër nxitjes së urrejtjes ose kundër gjuhës së urrejtjes.
Jo të gjitha komentet ishin negative. Disa përdorues tërhoqën një paralele midis zhurmës në internet mbi imazhin e muslimanes së re dhe hyrjes së partisë së ekstremit të djathtë Partia e Lirisë në qeverinë e re të së djathtës, të cilët u betuan disa javë përpara lindjes së saj . Si Partia e Lirisë ashtu edhe Partia Konservatore e Kancelarit Sebastian Kurz kanë bërë fushatë anti-emigrante dhe qeveria e re është zotuar se do të ulë përfitimet monetare për refugjatët dhe do të frenojë imigracionin e paligjshëm.
Megjithatë, Schwertner u bëri thirrje pasuesve të tij në Facebook që të ngriheshin në mbështetje të familjes së re në media sociale. Deri të enjten, më shumë se 10.000 vetë kishin shpërndarë mesazhin e tij dhe më shumë se 17.000 njerëz kishin postuar zemra, së bashku me fjalë të përgëzimit, mbështetjes dhe inkurajimit.
Barbara Unterlechner, drejtore e një qendre që ofron këshillim dhe mbështetje ligjore, #GegenHassimNetz ose “Kundër urrejtjes online”, tha se që nga ardhja e qindra mijëra emigrantëve që kërkonin azil dy vjet më parë, Austria kishte parë një rritje në komente raciste dhe gjuhë të urrejtjes në internet. Më shumë se 145,000 njerëz, shumë nga Siria, Iraku dhe Afganistani, kanë kërkuar azil në Austri që nga viti 2015, sipas shifrave të qeverisë.
“Një stereotip i caktuar rreth muslimanëve është bërë gjithnjë e më i zakonshëm në mediat sociale”, tha Unterlechner në një intervistë telefonike nga Vjena. “Pavarësisht nëse janë refugjatë ose mbajnë shami koke, pa dallim, mjafton që dikush të shfaqet si musliman dhe të etiketohet si armik i kulturës sonë”.
Nuk ishte ende e qartë nëse ndonjë nga komentet do të çonte në ankesa ligjore, tha Unterlechner. Por ajo u inkurajua nga numri i njerëzve që iu përgjigjën thirrjes së Schwertner për mbështetje, duke pasur parasysh se sa sfiduese mund të jetë për prokurorët që të ndjekin gjithë këtë valë postimesh të urrejtjes.
“Gjuha e urrejtjes është përfundimisht një problem shoqëror, i cili nuk mund të zgjidhet gjithmonë përmes ligjit”, tha Unterlechner. “Pra, ndoshta do të ishte më e dobishme mënyra e ndryshimit të kahjes së bisedës në internet”, shtoi ajo.
Marrë nga: The New York Times –
Përgatiti: Jeton Zenuni – /tesheshi.com/
