Seriali i njohur dramatik i Netflix “The Crown” do të marrë një pushim nga xhirimet e sezonit të tij të gjashtë si një shenjë respekti për mbretëreshën e ndjerë Elizabeth II, njoftuan mediat britanike.
Seriali “The Crown” i Peter Morgan bazohet në jetën, karrierën dhe trashëgiminë e mbretëreshës 96-vjeçare, e cila i shërbeu Britanisë për 70 vite të gjata si monarku i saj më jetëgjatë në histori. Elizabeta II. vdiq të enjten në kështjellën e saj Balmoral në Skoci.
“‘The Crown’ është një letër dashurie për të dhe nuk kam asgjë për të shtuar në këtë moment, vetëm heshtje dhe respekt”, tha Morgan pasi Pallati Buckingham njoftoi vdekjen e Mbretëreshës.
“Edhe unë pres që për një kohë të ndalojmë xhirimet për respekt”, shtoi ai.
Sezoni i pestë i serialit është planifikuar të dalë në Netflix në nëntor.
Nëse shfaqja vazhdon ende kur Mbretëresha vdes, do të jetë në pauzë për një kohë, tha drejtori i “The Crown”, Stephen Daldry disa vite më parë.
“Askush prej nesh nuk e di se kur do të vijë ajo kohë, por do të ishte e drejtë dhe e duhur të tregonim respekt për Mbretëreshën. Do të ishte thjesht një detyrim dhe një shenjë respekti. Ajo është një figurë globale dhe këtë duhet të bëjmë. Ajo është një grua e jashtëzakonshme dhe njerëzit do të mërziten”, tha Daldry për Deadline në vitin 2016.
Aktoreve Claire Foy, Olivia Colman dhe Imelda Staunton iu dha mundësia të portretizonin Mbretëreshën Elizabeth II. në serial në faza të ndryshme të jetës së saj. /tesheshi.com/
