Qindra izraelitë protestuan para rezidencës së kryeministrit Benjamin Netanyahu, i akuzuar për korrupsion.
Protestat u nisën pasi shtatë vetë u arrestuan të premten, të cilët u mblodhën në një miting të vogël kundër emërimit të Netanyahut si kryeministër pavarësisht se u akuzua, njoftoi AP.
Midis shtatë të arrestuarve është një ish-gjeneral i forcave ajrore izraelite. Policia tha se protesta e djeshme ishte “e paligjshme”, sepse pjesëmarrësit bllokuan rrugët.
Tre protestues, përfshirë gjeneralin në pension Amir Haskel, mbetën në paraburgim pas refuzimit të kushteve të lirimit dhe këmbënguljes për të marrë pjesë në protestën e sotme, raportojnë media izraelite.
Gjyqi i Netanyahut për mashtrim dhe ryshfet filloi muajin e kaluar në një gjykatë në Jeruzalem.
Një seancë e re është caktuar për muajin e ardhshëm.
Qeveria e re e Netanyahut mori detyrën në maj, duke i dhënë fund muajve të krizës politike.
Sipas marrëveshjes për ndarjen e pushtetit, Netanyahu mbeti kryeministër, ndërsa rivali i tij Benny Gantz u emërua ministër i Mbrojtjes dhe zv/Kryeministër.
Ata duhet të ndërrojnë rolet pas 18 muajsh. /tesheshi.com/
