Benjamin Netanyahu, kryeministri izraelit, ka vizituar Shtëpinë e Bardhë në një kohë të vështirë për të politikisht në Izrael. Takimi me presidentin e ri amerikan synon të lërë pas tetë vitet jo aq të ngrohta në marrëdhëniet me administratën e Barack Obama-s.
Një vizitë që për Izraelin do të thotë shumë, ashtu si për Netanyahu-n. Vetëm ardhja në pushtet e Donald Trump-it ka nxitur në Izrael plane të njëpasnjëshme për ndërtime ngulimesh të reja në territoret palestineze.
Netanyahu ka ditur ta miklojë publikisht Trump-in. Siç njofton The Jerusalem Post, këto janë fjalët e thëna prej tij për mikpritësin në konferencën e përbashkët të shtypit në Uashington:
“E njoh prej shumë kohësh presidentin, familjen e tij dhe ekipin e tij, dhe nuk ka mbështetës më të madh të popullit hebre dhe të shtetit hebre se presidenti Donald Trump. Ne nuk kemi një mik më të madh se presidenti Trump… Eshtë një ditë e re në marrëdhëniet izraelito-amerikane.”
Presidenti Trump, nga ana tjetër, nuk i ka mëshuar më angazhimit të gjatë ndaj zgjidhjes me dy shtete të konfliktit izraelito-palestinez, duke e lënë në dorë të palëve gjithçka.
Një ndryshim i madh ky nga qëndrimi i kahershëm i SHBA-së dhe i bashkësisë ndërkombëtare për konfliktin në fjalë.
“Duke parë atë me dy shtete apo me një shtet, unë pëlqej atë që pëlqejnë palët. Jam shumë i lumtur me atë që e pëlqejnë të dy palët… Shtetet e Bashkuara do të inkurajojnë një marrëveshje paqeje, një marrëveshje vërtet të madhe paqeje… Por janë palët që duhet ta negociojnë vetë drejtpërdrejt një marrëveshje të tillë.”
Trump e ka këshilluar kryeministrin izraelit të tregohej më i përmbajtur në planet për ndërtimin e ngulimeve të reja, teksa ka nënvizuar rishtas se do të donte ta zhvendoste në Jerusalem ambasadën amerikane në Izrael.
“Sa për zhvendosjen e ambasadës në Jerusalem, do të doja të shihja që kjo të ngjiste. Po e këqyrim me shumë kujdes. Të shohim se çfarë ngjet.” /tesheshi.com/
