Kryeministri izraelit bëri thirrje për falje për Elor Azaria-n, ushtarin e shpallur fajtor për vrasjen gjakftohte të një palestinezi të plagosur vitin e kaluar.
“Kjo është një ditë e vështirë dhe e dhimbshme më së pari për Elor-in, për familjen e tij, për ushtarët e Izraelit, për shumë qytetarë dhe prindër të ushtarëve… Unë e mbështes dhënien e faljes për Elor Azaria-n,” shkroi Netanyahu në llogarinë e tij në Facebook.
Thirrja e kryeministrit për falje erdhi disa orë pasi ushtari izraelit u shpall fajtor për vrasjen e një palestinezi të shtrirë përdhe të plagosur e të parrezikshëm, të cilin ai e qëlloi nga afër me gjakftohtësinë më të madhe.
“Ai meriton të vdesë”, është cituar në vendim t’i ketë thënë Elor Azaria një ushtari tjetër.
Ushtari 20-vjeçar mund të përballet me një dënim maksimal me 20 vite burg.
Megjithatë, presidenti izraelit, Reuven Rivlin, që ka autoritetin për falje, la të kuptohej se do ta shqyrtonte çështjen.
“Në rast se do të kërkohet falje, kjo do të merret në shqyrtim nga presidenti në përputhje me praktikat standarde dhe pas rekomandimeve nga autoritetet përkatëse,” thuhej në një deklaratë të presidencës.
Pamjet filmike që qarkulluan marsin e shkuar përcillnin vrasjen e pamëshirshme të palestinezit të shtrirë përdhe. /tesheshi.com/
