Kryeministri izraelit do të thoshte muajin e shkuar se një propozim për paqe i vitit 2002 e i mbështetur nga Liga Arabe kishte elemente pozitive, që mund të ndihmonin në përtëritjen e negociatave konstruktive me palestinezët.
Por pas presionit të anëtarëve të së djathtës të qeverisë izraelite mbi komentet e tij, Netanyahu ka deklaruar mbrëmë se iniciativa për paqe me palestinezët duhet të ndryshojë përpara se Izraeli ta mbështesë atë.
Siç raporton gazeta izraelite Haaretz, Netanyahu mësohet të ketë thënë përpara anëtarëve të partisë Likud: “Nëse vendet arabe e kuptojnë faktin se duhet ta rishohin propozimin e Ligës Arabe sipas ndryshimeve që ka kërkuar Izraeli, ne atëherë mund të bisedojmë.” Për të vijuar, “Por nëse ata e sjellin propozimin prej 2002-shit dhe e përcaktojnë atë si ‘merre ose lëre’, ne do të zgjedhim ta lëmë atë.”
Propozimi arab ka në thelb kërkesën për tërheqjen e Izraelit nga territoret e pushtuara, si dhe zgjidhjen me palestinezët të çështjes së refugjatëve, duke çuar në krijimin e një shteti palestinez. E tëra kjo në shkëmbim të normalizimit të marrëdhënieve me vendet arabe.
Ndërkohë që Netanyahu u ka përsëritur anëtarëve të Likud-it se iniciativa arabe ka elemente pozitive, ai ka shtuar, “Por është e qartë se ajo duhet përditësuar, me qëllim që të marrë në konsideratë ndryshimet që kanë ndodhur në rajon në vitet e fundit.”
Zbutja në një njëfarë mënyre e ligjëratës së Netanyahu-t shihet si një përpjekje për shmangien e kritikave pas emërimit të radikalit Lieberman si ministër i Mbrojtjes në qeverinë e tij, e pas kundërshtisë së fortë ndaj iniciativës franceze për paqe. /tesheshi.com/
