Pamjet filmike të bëra publike gjatë javës së shkuar, e ku tregohej një ushtar izraelit tek qëllonte për vdekje një palestinez të plagosur e të shtrirë përdhe, kanë ndezur polemikat në Izrael.
Vetë kryeministri Benjamin Netanyahu, që të enjten e dënoi sjelljen e ushtarit, dje foli në mbështetje të ushtrisë izraelite, duke e ndërruar tonin pas presionit të politikanëve të së djathtës.
“Çdo kundërvënie ndaj moralitetit të Forcave Izraelite të Mbrojtjes është e papranueshme. Ne duhet t’i mbështesim ushtarët tanë, që garantojnë sigurinë tonë,” deklaroi Netanyahu.
Ndërkaq, politikanët nacionalistë e kanë akuzuar ushtrinë për braktisje të ushtarit, teksa ky është ndaluar dhe për të ka një hetim në vazhdim.
Mediat izraelite e kanë cituar ushtarin të thotë se palestinezi “meritonte të vdiste”. Kurse një video e dytë e tregon ushtarin të shtrëngojë duart me një ultranacionalist të mirënjohur menjëherë pas ekzekutimit të të plagosurit.
Palestinezët, nga ana e tyre, deklarojnë se vrasja i mbështet pretendimet se Izraeli ushtron forcë të pakontrolluar dhe kryen vrasje pa gjyq. /tesheshi.com/
