Ish-kryeministri izraelit Benjamin Netanyahu, kandidat në zgjedhjet parlamentare të 1 nëntorit, la një shërbesë në një sinagogë të Jerusalemit këtë mbrëmje për shkak të sëmundjes, thanë shërbimet e tij, duke thënë se politikani veteran tani “ndihej mirë”.
Netanyahu, i cili pas dy javësh do të mbushë 73 vjeç, “u ndje keq” teksa lutej brenda një sinagoge të Jerusalemit gjatë shërbesës “Neila”, e cila është pjesë e kremtimit të Yom Kippur, Ditës së Shlyerjes, një nga ditët më të rëndësishme të kalendarit hebre, njoftuan shërbimet e tij.
“Ai iu nënshtrua një sërë testesh në vend dhe ishin normale. Tani ai ndihet mirë. Megjithatë, për të shmangur dyshimet, ish-kryeministri në mënyrë të pavarur synon të shkojë në spital për t’iu nënshtruar analizave”, shtuan ata.
Shërbimet e Netanyahut nuk thanë më shumë për sëmundjen e tij, por mediat izraelite raportuan për “dhimbje gjoksi”.
Kryeministri Yair Lapid, kundërshtari i Netanyahut në zgjedhjet parlamentare të nëntorit, i uroi atij një “shërim të shpejtë dhe të plotë”, në një mesazh në Tëitter.
Izraelitët shkojnë në kutitë e votimit më 1 nëntor, për të pestën herë në tre vjet e gjysmë, në zgjedhjet parlamentare që mund të kthejnë në plan të parë Netanyahun, kryeministrin më jetëgjatë në historinë e vendit. Netanyahu dha dorëheqjen në pranverën e vitit 2021, i pasuar nga një koalicion lara-lartë i udhëhequr tani nga Lapid.
Sondazhet e fundit vendosin Likud-in e krahut të djathtë të Netanyahut, i cili është akuzuar për korrupsion, në vendin e parë në synimet e votuesve me pak më shumë se 30 vende në Knesset (parlament) prej 120 anëtarësh.
“Koalicioni i tij i krahut të djathtë”, i cili përfshin gjithashtu parti ultra-ortodokse dhe të ekstremit të djathtë, po flirton me pragun e mazhorancës (61 deputetë), por nuk është i garantuar ta arrijë atë, sipas sondazheve. /tesheshi.com/
