Kryeministri izraelit, Benjamin Netanyahu, akuzoi Iranin se po ndërton një fabrikë në Siri dhe Liban për prodhimin e raketave, në mënyrë që t’i përdorë kundër vendit të tij.
Në fillim të takimit me Sekretarin e Përgjithshëm të Kombeve të Bashkuara në Gjenevë, ai akuzoi Iranin se po shndërron Sirinë “në një fortesë ushtarake në kuadër të qëllimit të saj të deklaruar për të fshirë Izraelin nga faqja e dheut”, njofton Reuters.
“Irani është gjithashtu duke punuar në ndërtimin e një fabrike për prodhimin e raketave, si në Siri ashtu edhe në Liban. Kjo është diçka që Izraeli nuk mund ta pranojë. Kjo është diçka që OKB-ja nuk mund t´a pranojë”, tha Netanyahu.
Sekretari i Përgjithshëm i Kombeve të Bashkuara, Guterres, nga 27 deri në 30 gusht ndodhet për një vizitë në Kuvajt, Izrael dhe Palestinë.
Netanyahu kishte deklaruar më herët, gjatë një takimi me presidentin rus Vladimir Putin, se forcimi i pozicionit të Iranit në Siri përbën një kërcënim për Izraelin, por edhe për botën.
Sipas tij, Irani është duke përparuar me ndikimin e tij edhe në Irak dhe Jemen, dhe kontrollon Libanin. /tesheshi.com/
