Ndërsa protesta të shumta janë përhapur nëpër Azi, Lindjen e Mesme dhe Afrikën e Veriut kundër vendimit të SHBA-së për njohjen e Jerusalemit si kryeqytetin e Izraelit, kryeministri Benjamin Netanjahu është në Bruksel, duke kërkuar mbështetjen e ministrave evropianë.
Në një konferencë të përbashkët të shtypit me shefen e politikës së jashtme të BE, Federica Mogherini, Netanjahu shprehu të hënën shpresën që “të gjitha ose shumica” e shteteve evropiane do të lëvizin ambasadat e tyre në Jerusalem, duke e njohur atë si kryeqytetin e Izraelit.
Ai pritet të takojë ministrat e BE-së më vonë gjatë ditës. “Jeruzalemi ka qenë kryeqyteti i Izraelit për 70 vitet e fundit. Presidenti Trump i ka vënë faktet drejtpërdrejt në tavolinë,” tha ai. “Paqja bazohet në realitet, paqja bazohet në njohjen e realitetit”. Ai pohoi se njohja e Jeruzalemit si kryeqytet i Izraelit do ta bëjë “paqen të mundshme”, pavarësisht faktit që palestinezët e shohin Jerusalemin Lindor si kryeqytetin e shtetit të tyre të ardhshëm. “Izraeli ua ka zgjatur dorën e tij për paqe fqinjëve tanë palestinezë për njëqind vjet, shumë më përpara se të ishte shteti i Izraelit dhe pasi u krijua”, tha ai gjithashtu.
Ai gjithashtu e quajti “qesharak” refuzimin e OKB-së për Jerusalemin si një kryeqytet izraelit. “Tani ka një përpjekje për të sjellë një propozim të ri paqësor nga administrata amerikane. Mendoj se duhet t’i japim shansin paqes”, tha ai.
Gazetari i Al Jazeera-s, duke raportuar nga Brukseli, tha se shumica e ministrave të BE-së nuk e mbështetën masën e SHBA. “Netanjahu u prit me përzemërsi, por pas dyerve të mbyllura ekziston ndjenja se situata nuk ka ecur më përpara në drejtim të përpjekjeve të paqes në Lindjen e Mesme sesa më parë.” “Ka disa shtete brenda BE-së si Republika Çeke dhe Hungaria, të cilët thonë se do të ndjekin shembullin e SHBA-së, por shumica e tyre mendojnë se kjo nuk duhet të bëhet tani. Ata mendojnë se zgjidhja me dy shtete është rruga që duhet ndjekur”.
Nga ana e saj, Mogherini tha se BE do të vazhdojë të respektojë konsensusin ndërkombëtar për Jerusalemin. “Ne e dimë se ku qëndron Bashkimi Evropian. Ne besojmë se zgjidhja e vetme reale për konfliktin midis Izraelit dhe Palestinës bazohet në dy shtete me Jerusalemin si kryeqytetin e të dyve”. /tesheshi.com/
