Ish-kryeministri i Kosovës, Ramush Haradinaj, ka deklaruar se Beogradi do të bombardohet nëse vetëm një ushtar serb hyn në territorin e Kosovës.
Kreu i AAK-së tha se nuk ka asnjë analogji mes luftës në Kosovë dhe luftës në Ukrainë.
Ai thotë se Rusia ka ndikim në disa pjesë të Ballkanit, por që, sipas tij, në Kosovë nuk është fare e pranishme. Haradinaj thotë se Vuçiç dhe Serbia për momentin nuk kanë guxim të ndërhyjnë në veri të Kosovës, për shkak të garancive ndërkombëtare.
“Nëse kjo do të ndodhte, atëherë e gjithë bota do ta dinte se Vuçiç po e bën atë për Rusinë. Nëse ai nuk ka mundësi të gjejë një zgjidhje për Rusinë, Perëndimi është shumë i mirë në gjetjen e një zgjidhjeje për Serbinë, siç bëri dikur 1999”, tha ai për Radio Dukagjinin.
“Unë e di që amerikanët nuk lejojnë asnjë ushtar serb të hyjë në territorin e Kosovës. E di që Beogradi do të bombardohet nëse ndodh diçka e tillë, si në vitin 1999. Udhëheqja serbe e di mirë këtë. Nëse një oficer serb kalon nëpër territorin e Kosovës, do të bombardohet Beogradi, e jo ndonjë territor tjetër”, ka shtuar Haradinaj.
“Ne duhet ta bëjmë punën tonë. Por Serbia e di se Kosova është zonë e përgjegjësisë së Amerikës, Britanisë dhe të tjerëve”, tha Haradinaj. /tesheshi.com/
