Nga Blendi Gashi
Ndonëse ende nuk dihet nëse do mbahen zgjedhjet e parakohshme parlamentare këtë vit, të gjitha partitë politike në Kosovë kanë nisur një parafushatë intensive ku çdo ditë takojnë elektoratin e tyre, edhe pse thonë se këtë e bëjnë për shkak të zgjedhjeve lokale.
Por duke parë krizën politike dhe kërkesën e vazhdueshme të opozitarëve, zgjedhjet parlamentare mund të mbahen në të nxehtin e verës.
Pikërisht në këta muaj Gjykata Speciale do nis punën e saj ku pritet të ngrejë aktakuzat e para e që raportohet se prekin disa nga figurat kyçe të UÇK-së, tashmë politikanë të nivelit të lartë.
Mediat kosovare raportojnë se ndërkombëtarët nuk pëlqejnë që zgjedhjet e parakohshme të mbahen në pranverë për shkak të Speciales, që sipas tyre mund të ketë ndikim të drejtpërdrejt në zgjedhje.
Por shtrohet pyetja a mundet me të vërtetë Specialja të ngrejë tensione në fushatën elektorale dhe të ndikojë në procesin zgjedhor dhe rezultat?
Ja ç’thonë analistët…
Shefqet Dibrani shprehet se ngritja e aktakuzave të Speciales në qershor dhe mbajtja eventuale e zgjedhjeve në këtë kohë, do të reflektojë drejtpërdrejt në procesin zgjedhor, i cili sipas tij nuk do të jetë as i drejtë e as i lirë.
“Lufta e Kosovës dhe procesi i pavarësisë lidhet kryesisht me PDK-në, prandaj Gjykata Speciale do të prodhojë tensione, madje me rrezik për zhvillime negative, pasi ka mundësi reale që pushteti i ardhshëm të bartet në duart e një strukture politike e cila ka qenë e lidhur drejtpërdrejt me sistemin jugosllav, andaj rreziqet janë të përhershme dhe të paparashikueshme. Nëse nga arrestimet e shumta mund të pësoj kryesisht PDK-ja, ndërsa në anën tjetër do të bëhen përpjekje për ta shantazhuar edhe Vetëvendosje-n, shtrohet pyetja kush do të vjen në pushtet, kur brenda LDK-së nuk ka asnjë lëvizje reformiste”, thotë Dibrani për tesheshi. com.
Leon Duhanaj, thotë se në kushte normale shpallja e aktakuzave, nuk do duhej të kishte ndikim të madh në shoqëri, aq më pak të ndikonte në ndonjë proces zgjedhor eventual.
“Nëse të akuzuarit kushdo qofshin ata, pretendojnë të jenë të pafajshëm atëherë nuk kanë arsye për t’u shqetësuar. Në anën tjetër, nëse kemi të bëjmë me njerëz të cilët nuk na lënë sytë t’i çelim me parollat patriotike, atëherë, duhet t’i nënshtrohen drejtësisë pa asnjë kundërshti, në të kundërtën mbetet mendimi që disa njerëz në emër të patriotizmit, po e mbajnë peng Kosovën dhe qytetarët e saj. Kosova duhet të vazhdojë rrugëtimin sepse individët janë vetëm aktorë të përkohshëm të cilët duhet patjetër të lëshojnë rrugë”, thotë Duhanaj, për tesheshi. com.
Arsim Haziri, mendon se nëse Specialja e inicon aktakuza ndaj aktorëve të lartë politikë, atëherë mund të ndikojë në procesin e parakohshëm eventual zgjedhor.
“Po të shpejtohej procesi ì funksionimit të këtij mekanizmi ndërkombëtar, dhe po të zbatohej tërë agjenda e saj ashtu edhe siç po deklarohet do të ishte e mirëseardhur edhe për kohën që jemi. Mbi këtë bazë konsideroj se funksionimi i kësaj gjykate do të shpërqendronte situatën aktuale njëherit do të pastronte skenën aktuale politike”, thekson Haziri për tesheshi. com. /tesheshi.com/
