Forcat e Armatosura Turke kanë dislokuar tanke e artileri në Silopi, në kufirin jugor me Irakun, lëvizje të cilën ministri turk i Mbrojtjes, Fikri Ëshëk, e ka arsyetuar në kuadër të operacioneve kundër terrorizmit, të përgatitjeve për të qenë gati për çdo mundësi.
Dislokimi pason një deklaratë të presidentit Erdogan të shtunën e lënë pas, që bënte me dije se Ankaraja do të kishte një përgjigje ndryshe për milicitë shiite nëse ato kryenin terror në qytetin irakian të Telaferit.
Al Jazeera njofton ndërkohë për një reagim të ashpër të kryeministrit irakian, Hajdar Abadi, që e ka paralajmëruar Turqinë për provokimin e një përplasjeje.
“Nuk duam luftë me Turqinë, dhe nuk duam përplasje me të. Por nëse përplasja ndodh, ne jemi gati. Do ta konsiderojmë [Turqinë] një armik dhe do ta trajtojmë si të tillë,” raportohet të ketë thënë Abadi.
Turqia ka kërkuar të ketë rol në betejën për çlirimin e Mosulit, një kërkesë e hedhur poshtë vijimësisht nga kryeministri i Irakut, madje me një gjuhë të ashpër.
Përndryshe, gjatë një vizite në Katar, ministri i Jashtëm turk, Mevlyt Çavushogllu, duke folur për kampin në Bashika të Irakut, ka theksuar se mes dy vendeve është krijuar tension i panevojshëm, e se po punohej për ta zgjidhur çështjen përmes kanaleve diplomatike.
Iraku dhe Turqia janë prej javësh në një përplasje verbale, si për kampin në Bashika, ashtu dhe për pjesëmarrjen e forcave turke në mësymjen për çlirimin e Mosulit nga ISIS-i. Qëndrimi i ashpër i kryeministrit të Irakut, rrjedhojë e zhvillimeve rajonale e më gjerë, është një prej burimeve kryesore të marrëdhënieve aktualisht të tensionuara mes dy vendeve. /tesheshi.com/
