Përvjetori i 16-të i Pavarësisë së Kosovës vjen në delikatesën e një kohe të trazuar globale me tërmete gjeopolitike. Dhe si një vend që është viktimizuar por dhe ka triumfuar prej tyre, Kosova po përjeton momente historike në përballje me valë e reja zhvillimesh, sidomo nga fakti se Rusia e ka përligjur sulmin e saj ndaj Ukrainës me bombardimin e NATO-s ndaj Serbisë, pas së cilës erdhi çlirimi e vite më pas pavarësia e Kosovës. Ndërkohë, muaj më parë, Serbia do tentonte të aplikonte një model rus në Banjskë të Zveçanit në veri të Kosovës, por pa ia dalë.
Tashmë, e gjitha loja është diplomaci. Perëndimi po përpiqet ta josh sa më shumë Serbinë për ta larguar nga influence ruse, ndërsa Serbia e shfrytëzon këtë për të arritur objektivin e madh të saj, krjimin e një Asosacioni të Komunave Serbi, më saktë një lloj Serbia brenda Kosovës, si me Republika Srpska në Bosnjë. Dhe siç po shihet entiteti serb aty me në krye Dodik po arrin ta kolapsojë Bosnjën, gjë së cilës i frikësohet Kurti teksa refuzon krijimin e Asosacionit, duke duke mos pranuar as garancitë amerikane se kjo nuk do ndodhë me Kosovën.
Nga ana tjetër, pas 16 vitesh pavarësi, Kosova ende nuk njihet nga pesë shtete të BE-së, pos kësaj me një proces njohjesh që kanë ngecur prej vitesh.
Në një mbledhje qeveria kushtuar këtij përvjetori pavarësie, kryeministri Albin Kurti tha se Kosova është “shtëpia e përbashkët”, që u ndërtua me mbështetjen e aleatëve.
“Pas luftës shkatërruese 1998-1999, në rindërtuam shtëpitë tanë. Me mbështetjen nga aleatët tanë ndërkombëtarë, ne ndërtuam shtëpinë tonë të përbashkët, Republikën e Kosovës. Një Republikë parlamentare e mirëfilltë, me drejtësi e barazi për qytetarët e saj, kontribuese në paqe dhe garanci për paqe. Një shtet që vlerat demokratike, respektimin e të drejtave të njeriut e të gjitha pakicave dhe drejtësinë sociale e solidaritetin, i ka në thelb të çdo kursi politik dhe shoqëror. Një çerek shekulli pas luftës, Republika jonë qëndron e fortë. Ne qëndrojmë krenarë sepse përkundër sfidave, shteti ynë po zhvillohet”, tha Kurti.
Pavarësia e Kosovës, nisur nga titulli i filmit të njohur mbi shpalljen e pavarësisë së Shqipërisë më 1912-ën, i bie të jetë “Nëntori i Tretë”, ama vendosur në shkurt dhe jo me flamur kuqezi por verdhë e blu, diktuar nga autorët e aktit të pavarësisë, SHBA e BE. /teshesh.com/
