Presidenti amerikan, Donald Trump duket se përmbushur një premtim të fushatës elektorale, duke nënshkruar një urdhër ekzekutiv që sjell tërheqjen e Shteteve të Bashkuara nga marrëveshja e tregtisë së lirë transoqeanike, TPP. Marrëveshja tregtare, një nismë e rëndësishme e ish-presidentit Obama në politikën me Azinë, ishte nënshkruar nga 12 shtete.
“Diçka e madhe për punëtorin amerikan kjo që sapo bëmë”, tha Trump në momentin që hodhi në kosh marrëveshjen me një të rënë të lapsit.
Ai gjithashtu, shkurtoi financimin për grupet ndërkombëtare që mbështesin abortin dhe ngriu punësimin e disa kategorive të punonjësve federalë.
Gjatë fushatës elektorale, Trump e kishte kritikuar marrëveshjen e tregtisë së lirë të Trans-Paqësorit duke e cilësuar atë “një katastrofë të mundshme për vendin”, me argumentin se dëmtonte prodhimin në Shtetet e Bashkuara.
Marrëveshja tregtare që mbulonte 40 për qind të ekonomisë së botës u negociua në vitin 2015 nga shtete ku përfshihen Shtetet e Bashkuara, Japonia, Malajzia, Australia, Zelanda e Re dhe Meksika.
TPP synonte të forconte lidhjet ekonomike dhe të nxiste rritjen ekonomike, përfshirë edhe reduktimin e tarifave tregtare. Në të përshkruheshin masa si forcimi i standardeve për forcën e punës dhe ato mjedisore, të drejtës së autorit, patentave dhe mbrojtje të tjera ligjore.
Marrëveshja ishte dizenjuar për të krijuar një treg të mundshëm të përbashkët, të ngjashëm me atë të BE-së. /tesheshi.com/
